წელს 100 წელი შესრულდა მას შემდეგ, რაც 1921 წლის ოკუპაციამ, პირველ პოლიტიკურ ემიგრაციას ქვეყანა დაატოვებინა. მეც, ისევე როგორც ბევრი თანამემამულე, ემიგრაციაში დავიბადე, – ამის შესახებ საქართველოს პრეზიდენტმა, სალომე ზურაბიშვილმა დღეს, საქართველოს დიასპორის დღისადმი მიძღვნილ ფორუმზე განაცხადა.
„პოლიტიკური ემიგრაციისთვის ემიგრაცია დამოუკიდებლობისა და თავისუფლებისთვის ბრძოლის გაგრძელების ფორმა იყო. ეს ბრძოლა დასრულდა 30 წლის წინ დამოუკიდებლობის აღდგენით და დღეს, სიმბოლურად გენერალ კვინიტაძის სამშობლოში დაბრუნებით. დამოუკიდებლობის დღიდან წარმოიშვა მძლავრი, ახალი ემიგრაცია და ჩვენდა უნებურად საქართველო ემიგრაციის ქვეყნად იქცა. დღემდე ჩვენ ბოლომდე გააზრებული არ გვაქვს, თუ რას ნიშნავს, რა პასუხისმგებლობას და რა პოტენციალს ნიშნავს, როცა ჩვენი მოსახლეობის თითქმის მილიონ-ნახევარი ადამიანი საზღვრების მიღმა სწავლობს, ცხოვრობს, მოღვაწეობს“, – განაცხადა საქართველოს პრეზიდენტმა.