“რამდენიმე წელი ვცხოვრობდი საზღვარგარეთ და ძალიან კარგად მესმის ის ემოცია, პასუხისმგებლობა, რომელიც ამ სტატუსს ახლავს”

„ერთიანი საქართველო თითოეული ჩვენგანის მონაპოვარია. აუცილებელია ყველა ჩვენგანის შრომა და თავდადება იმისთვის, რომ ჩვენი ქვეყანა გაერთიანდეს. რა თქმა უნდა, ძლიერ დიასპორას ამაში განსაკუთრებული როლი აქვს“, – ამის შესახებ საქართველოს პარლამენტის თავმჯდომარემ, კახა კუჭავამ სახელმწიფო ცერემონიების სასახლეში, დიასპორის დღისადმი მიძღვნილ ფორუმზე „ძლიერი დიასპორა ერთიანი საქართველოსთვის“ განაცხადა.

„ფორუმის ფარგლებში, საშუალება გვაქვს, კომუნიკაცია გვქონდეს ჩვენს თანამემამულეებთან, ჩვენი დიასპორის წარმომადგენლებთან. აუცილებელია, უფრო გააქტიურდეს პარლამენტისა და აღმასრულებელი ხელისუფლების თანამშრომლობა, შეიქმნას ის ძლიერი პოლიტიკური დოკუმენტები, რომლებიც ქვეყნების მიხედვით იქნება მორგებული ჩვენი დიასპორის წარმომადგენლების ინტერესებზე. მე ვარ ერთ-ერთი, ვინც დიასპორის წევრად მივიჩნეოდი, რამდენიმე წელი ვცხოვრობდი საზღვარგარეთ და ძალიან კარგად მესმის ის ემოცია, პასუხისმგებლობა, რომელიც ამ სტატუსს, ამ როლს ახლავს. დიასპორის თითოეული წარმომადგენელი არის ჩვენი ქვეყნის ელჩი და სახე იმ ქვეყანაში, სადაც ის ცხოვრობს. ძალიან მნიშვნელოვანია, რომ ჩვენ ისინი ვიხილოთ ძლიერები, წელში გამართულები, რადგან, ამ შემთხვევაში, ზუსტად ასეთს დაინახავენ სხვები საქართველოს. ძალიან მნიშვნელოვანია სწორი და ეფექტიანი პოლიტიკა, რომ ჩვენ კარგად გვესმოდეს, რით შეგვიძლია დამატებით დავეხმაროთ იმ ადამიანებს, რომელთაც ეს ყველაზე მეტად სჭირდებათ, არიან ჩვენგან შორს. ყველაზე მთავარია, უნდა ვიზრუნოთ იმაზე, რომ მაქსიმალურად შეძლონ დაბრუნება გაერთიანებულ საქართველოში და განვაგრძოთ ერთად ცხოვრება. საკმაოდ ამბიციური გეგმა გვაქვს 2024 წლისთვის – რომელიც ევროკავშირის წევრობას მოიაზრებს. ეს, სამ-ნახევარი წლის განმავლობაში, ძალიან დიდი შრომის, დიდი ძალისხმევის ჩადებას ნიშნავს, რათა გვქონდეს უფლება, გავაკეთოთ განაცხადი ევროკავშირის წევრობაზე. ეს პროცესი ჩვენი დიასპორის გარეშე ვერ წარმომიდგენია“, – განაცხადა პარლამენტის თავმჯდომარემ.

ფორუმში „ძლიერი დიასპორა ერთიანი საქართველოსთვის“ აღმასრულებელი და საკანონმდებლო ხელისუფლების უმაღლესი პირები და 200-ზე მეტი დიასპორული ორგანიზაციაა ჩართული. პანდემიით გამოწვეული გარემოებების გათვალისწინებით, წელს, ღონისძიება სემინარის ფორმატში ტარდება.