„დარწმუნებული ვარ, ნინოწმინდის პანსიონატში სათანადო პირობებია, მაგრამ მნიშვნელოვანია, სახელმწიფოს შესაბამისი მონიტორინგის შესაძლებლობა ჰქონდეს. დარწმუნებული ვარ, ყველას ექნება შესაძლებლობა, გაეცნონ იქ არსებულ პირობებს“, – ამის შესახებ საპარლამენტო უმრავლესობის წევრმა, შალვა პაპუაშვილმა ჟურნალისტებს ნინოწმინდის პანსიონთან დაკავშირებით განუცხადა.
მისივე თქმით, შესაბამის ინსტიტუტებს დაწესებულებასთან წვდომა უნდა ჰქონდეთ.
„როცა საქმე ეხება არასრულწლოვნებს, აუცილებელი არ არის, ყველა ადამიანს ჰქონდეს წვდომა და მონიტორინგის შესაძლებლობა, მაგრამ სახალხო დამცველს, სოციალურ მუშაკებს აქვთ უფლებამოსილება, მონიტორინგი განახორციელონ. დარწმუნებული ვარ, სახალხო დამცველს ამის შესაძლებლობა ექნება. პანსიონატის ხელმძღვანელობის მხრიდან სკეპტიციზმი იყო ცალკეული ინსტიტუტების მიმართ, ეს გაუგებრობა გაირკვევა და ყველას შესაძლებლობა ექნება, მონიტორინგი განხორციელდეს“, – განაცხადა შალვა პაპუაშვილმა.