საუდის არაბეთმა უარყო ისრაელის მოთხოვნა სამხედრო თვითმფრინავებს სამეფოს ტერიტორიაზე გაგზავნისა და დუბაიდან თელ-ავივში მიმავალი ავიაკომპანია Fly Dubai-ის რეისის მგზავრების უკან დაბრუნების შესახებ. ინფორმაციას Reuters-ი უსაფრთხოების სამსახურის ორ წყაროზე დაყრდნობით ავრცელებს.
წყაროების ინფორმაციით, ისრაელი საუდის არაბეთიდან მოქალაქეების დასაბრუნებლად სამხედრო თვითმფრინავების გაგზავნას ითხოვდა. ერთ-ერთი წყაროს ცნობით, ისრაელის საჰაერო ძალები მგზავრების დასაბრუნებლად C-130 Hercules-ის ტიპის თვითმფრინავების გაგზავნას ამზადებდნენ.
საბოლოო ჯამში, როგორც Reuters-ი წერს, მგზავრები Fly Dubai-ს სხვა თვითმფრინავით დაბრუნდნენ ისრაელში.
ოთხშაბათს ისრაელის პრემიერ-მინისტრმა ბენიამინ ნეთანიაჰუმ განაცხადა, რომ დუბაიდან თელ-ავივში მიმავალი Fly Dubai-ს თვითმფრინავის მეორე პილოტმა კაპიტნის დაჭრის შემდეგ ლაინერის ჩამოგდება სცადა. მისი თქმით, მგზავრებმა თავდამსხმელის შეჩერება შეძლეს, ხოლო სხვა პილოტებმა თვითმფრინავი საუდის არაბეთში უსაფრთხოდ დასვეს.
აშშ-ის პრეზიდენტი დონალდ ტრამპი საუდის არაბეთს მოუწოდებს, შეუერთდეს აშშ-ის შუამავლობით გაფორმებულ აბრაამის შეთანხმებებს, რომელთა ფარგლებშიც რამდენიმე არაბულმა ქვეყანამ ისრაელთან დიპლომატიური ურთიერთობები დაამყარა.
საუდის არაბეთი შეთანხმებებში მონაწილეობაზე უარს ამბობს, თუ ისრაელთან ურთიერთობების ნორმალიზებას პალესტინის სახელმწიფოს შექმნის რეალური პერსპექტივა არ მოჰყვება.