უკრაინის გენერალური პროკურორის მოადგილის ნაზარ ხოლოდნიცკის ოფიციალური განცხადებით, ეროვნული ანტიკორუფციული ბიურო „ოდესის საპორტო ქარხნის საბაზრო ღირებულების შემცირებასთან მიხეილ სააკაშვილის შესაძლო კავშირს გამოიძიებს“.
გამოძიება უკრაინის რადას დეპუტატების, ნიკოლაი კნიაჟნიცკის, პაველ პიზნეკუნის, ალექსანდრ დროზდიკისა და დიმიტრი გოლუბოვის, განცხადების საფუძველზე დაიწყო.
ამასთან დაკავშირებით გაზეთი „ასავალ დასავალი“ წერს.
როგორც გამოცემა იტყობინება, უკრაინელი დეპუტატები ოდესის გუბერნატორს განსაკუთრებით დიდი მასშტაბის კორუფციაში ადანაშაულებენ. მათი მტკიცებით, უკრაინის სახელმწიფო ხაზინამ 6,5 მილიარდი (დაახლოებით 250 მილიონი დოლარი) გრივნა იზარალა, რადგან სააკაშვილმა ოდესის პორტის ქარხნის გასაყიდი ფასი მიზანმიმართულად დააგდო.
სტატიაში საუბარია ასევე იმის შესახებაც, რომ პოროშენკო სააკაშვილის მიმართ უკმაყოფილებას გამოხატავს. კერძოდ, უკრაინული მედიის ცნობით, პოროშენკომ საქართველოს ექს-პრეზიდენტს საყვედური უთხრა, რადგან ის უფრო მეტ დროს საქართველოში მიმდინარე პოლიტიკურ პროცესებს უთმობს, ვიდრე თავის საქმიანობას. მათივე ინფორმაციით, სააკაშვილის „რეფორმების“ შედეგად ოდესის პორტში კორუფციის დონემ მოიმატა.