ერთადერთი მესიჯი, რაც ოპოზიციისგან მოდის, არის – ჩვენ გვინდა ხელისუფლებაში მოსვლა, – ამის შესახებ „გირჩის“ ერთ-ერთმა ლიდერმა, იაგო ხვიჩიამ საქართველოს პირველი არხის ეთერში განაცხადა.
„ოპოზიციამ უნდა თქვას, რა უნდა, დაფაზე უნდა ჩამოვწეროთ, რა გვინდა – ეს, ეს, ეს. იმიტომ, რომ ერთადერთი მესიჯი, რაც ოპოზიციისგან მოდის, არის – ჩვენ გვინდა ხელისუფლებაში მოსვლა, მაგრამ იმაზე არავინ ლაპარაკობს, რა შეიცვალა მას შემდეგ, რაც ხელისუფლებაში ვიყავით, ან რა შეიცვლება, არსებული ხელისუფლებიდან ახალი რა იქნება და არის მხოლოდ ემოციების ომი. ეს ემოციების ომი იმდენად გახუნდა. ყველამ იცის, რომ ერთ-ორ დღეში მიინავლება ასეთი ტიპის პროტესტი. „ქართული ოცნება“ მშვიდად არის და ხდება რაღაც ემოციების ამოფრქვევა, რომელიც საბოლოო ჯამში, ნებისმიერ პროტესტს ანადგურებს“, – განაცხადა ხვიჩიამ.
მისი თქმით, ერთადერთი, ვისაც მიტინგზე გამომსვლელები საყვედურს ეუბნებიან და ლანძღავენ, არის ხალხი, რომელიც მიტინგზე არ მოდის.
„ხალხი არ მოვა ამ მიტინგზე, როცა არ ეუბნები, რისთვის უნდა გამოიყვანო, ზოგადად უსამართლობის გასაპროტესტებლად. ასე, ხალხი სახლიდანაც აპროტესტებს უსამართლობას. შენ თუ რამე გინდა, წესიერად დამპატიჟე და მოვალ. ჩემი აზრით, ეს არის ხალხის მესიჯი, რომლის გაგებაც არ გვინდა და გვინდა, საყვედურები ვუთხრათ, რა ცუდები არიან, რომ არც ერთ ემოციურ გამონათქვამზე არ გამოდიან. ეს ხალხი ყველა პოლიტიკოსს იცნობს. იცნობს მათ ემოციურ გამოსვლებს, მათი გულწრფელობის შესახებაც იცის და ადეკვატურად იქცევა, ჩვენ კი ადეკვატურად მოქცეულ ხალხზე ვბრაზდებით“, – განაცხადა ხვიჩიამ.
როგორც ხვიჩიამ აღნიშნა, ცხრა წლის განმავლობაში„ნაციონალური მოძრაობის“ სტრატეგიაა, მეორე ძალად მარტო დარჩეს.
„ამ პერიოდში ქართველ ხალხს სული ამოხდა „ქოცების“ ყურებით და ამ ჩხუბით, ამის შეცვლა კი არავის უნდა. ჩვენ ეს უნდა დავამთავროთ. მე ამის დამთავრება მინდა, მაგრამ ამ წუთას, ოპოზიციაში ამის რესურსს და სურვილს ვერ ვხედავ. აი, ამიტომ ვსვამ კითხვებს – შეკრული ხომ არ ხართ „ქართულ ოცნებასთან“. ეს მათი თამაშია“, – განაცხადა იაგო ხვიჩიამ.