Interpressnews-ის ფოტოგრაფი, გიორგი ნიკოლიშვილი, რომელსაც 5 ივლისს ორკებმა სცემეს, ამბობს, რომ მისი ჯანმრთელობის მდგომარეობა სტაბილურად მძიმეა. ნიკოლიშვილი კლინიკაში აგრძელებს მკურნალობას, მისივე თქმით, დამატებითი კვლევები უნდა ჩაუტარდეს.
“სიტუაცია სტაბილურია, სტაბილურად მძიმე. ტკივილები მაქვს თავის არეში. ჰემატომა ტვინში და მძიმე ვითარებაა. მე მინდა, მივუსამძიმრო ლექსოს ოჯახს, თითოეულ მეგობარს, კოლეგას. გული მწყდება, რომ ვერანაირად ვერ მოვახერხე დღეს იქ მისვლა და ჩემი გულისტკივილის გამოხატვა. ყველას ვუსამძიმრებ, დიდი ტრაგედიაა ეს ყველასთვის.
ძალიან დიდი იმედი მაქვს, რომ გამოძიება იქნება ობიექტური და სამართლიანი, უმკაცრესად დაისჯება ყველა. იმ ეპიზოდში საერთოდ არაფერი მახსოვს, ვინ იყვნენ, რა მოხდა – ეს ეპიზოდი საერთოდ წაშლილია ჩემი გონებიდან. გონება დავკარგე, ინფორმაცია მაქვს, რომ 3 პირია დაკავებული ამ საქმეზე, ამოცნობა ჩემთვის ამ ეტაპზე შეუძლებელია, მაგრამ ძალიან დიდი იმედი მაქვს, რომ არა მარტო ჩემ, არამედ ნებისმიერ ნაწილში, თითოეულ ჩემი კოლეგაზე მოძალადე იქნება უმკაცრესად დასჯილი. […] დამატებითი კვლევები არის საჭირო და პასუხიდან გამომდინარე გვეცოდინება სრული გამოჯანმრთელების დრო. ამ ეტაპზე, დრო, როდის გამოვჯანმრთელდები სრულად, არ ამბობენ”. – ამბობს ნიკოლიშვილი.