“ბოიკოტი მოდაში შემოვიდა, რაც არასწორია – მაშინ მეც წავალ ბოიკოტში და დავისვენებ”

ბოიკოტი მოდაში შემოვიდა, რაც არასწორია – მაშინ მეც წავალ ბოიკოტში და დავისვენებ, – ამის შესახებ პარტია „მოქალაქეების“ ერთ-ერთმა ლიდერმა, ლევან იოსელიანმა „პალიტრანიუსის“ გადაცემაში „360 გრადუსი“ განაცხადა.

როგორც იოსელიანი ამბობს, ბოიკოტი უკიდურესი ფორმაა, მანამდე კი ყველაფერი „უნდა სცადო“.

„ზოგადად, მედიასთან მიმართებაში და ისედაც, ბოიკოტი არ მიმაჩნია სწორად. ბოიკოტი მოდაში შემოვიდა, მათ შორის პარლამენტში. იქ პოლიტიკური პარტიები ახორციელებენ ბოიკოტს. ბიუროზე „ნაციონალური მოძრაობამ“ შემოიტანა განცხადება, რომ ივლისი-აგვისტო ბოიკოტში მიდის, რაც არასწორია. მაშინ მეც წავალ ბოიკოტში, დავისვენებ. შემდეგ სექტემბერში რატომ მთავრდება ეს ბოიკოტი?! ზოგადად, ბოიკოტი არის უკიდურესი ფორმა. როდესაც პარლამენტში ყველაფერი სცადე, ყველა რესურსის ამოწურე, ყველა ფორმატში მიიღე მონაწილეობა და ბოლოს თუ ვერაფერს გახდი, ეს უკვე, რეგლამენტის გათვალისწინებული უკიდურესი ფორმა. ჯერ ახლა შემოვიდნენ“, – განაცხადა ლევან იოსელიანმა.