„იმის მიუხედავად, რომ „თბილსერვისის“ ადმინისტრაცია ამ საკითხებზე მუდმივად მუშაობს და კონკრეტული შედეგები უკვე არის, მაინც მოხდა გაფიცვის პროვოცირება“, – განაცხადა თბილისის ვიცე-მერმა, ირაკლი ხმალაძემ „თბილსერვის ჯგუფის“ თანაშრომლების გაფიცვაზე საუბრისას.
„მათი მოთხოვნების თითქმის ყველა კომპონენტში, სამსახური მუშაობდა და გარკვეული პროგრესი და შედეგები უკვე მიღებული გვაქვს. კერძოდ, გასული წლის დეკემბერში, მათი ხელფასები 20%-ით გაიზარდა, უნიფორმები შეძენილია და გარკვეული ტექნიკა უკვე განახლებულია. გარკვეული ნაწილის განახლებაზე კი, უკვე მოლაპარაკებებიც დასრულებულია და, ევროპის განვითარებისა და რეკონსტრუქციის ბანკის მიერ, სესხიც გამოყოფილია. უნდა გამოცხადდეს რამდენიმე მილიონევროიანი ტენდერი დამატებითი სპეცტექნიკის შესაძენად. ეს არ იყო გაფიცვა. ეს იყო თანამშრომლებისთვის მუშაობაში ხელის შეშლა. გარკვეულწილად, ეს იყო საბოტაჟი, რაც ჩვენთვის მიუღებელია. ამას აუცილებლად მოჰყვება შესაბამისი ზომები“, – აღნიშნავს ირაკლი ხმალაძე.
მისი თქმით, ვინც სამუშაოზე დაბრუნებას აპირებდნენ, გარკვეული ჯგუფების მხრიდან „ბულინგის“ მსხვერპლი გახდნენ.
„პირველ რიგში, უნდა ვთქვა, რომ ეს არის უკანონო გაფიცვა და არანაირი პროცედურა, წინასწარი გაფრთხილება ამ შემთხვევაში არ მომხდარა, რაც ძალიან ცუდი ფაქტია, უფრო მეტიც, გაფიცვის ფარგლებსაც გასცდა მათი აქტი. ის თანამშრომლები, ვინც სამუშაოზე დაბრუნებას აპირებდნენ, გარკვეული ჯგუფების მხრიდან „ბულინგის“ მსხვერპლი გახდნენ, რაც კატეგორიულად მიუღებელია. თანამშრომლების გარკვეულმა ჯგუფმა ხელი შეუშალა ადამიანებს, რომლებსაც სამსახურში დაბრუნება უნდოდათ და სამუშაო რეჟიმის განახლება. ამას ადმინისტრაციის მხრიდან შესაბამისი ზომები მოჰყვება. შემიძლია გითხრათ, რომ მუნიციპალიტეტი აქამდეც და ამის შემდეგაც ყოველთვის იმუშავებს იმისთვის, რომ სათანადო პირობები შეიქმნას, როგორც ანაზღაურების, ასევე მატერიალურ-ტექნიკური საშუალებების მხრივ“,- განაცხადა ირაკლი ხმალაძემ.