ნაძალადევის რაიონში, ახალგაზრდა ქალის დაჭრის ფაქტთან დაკავშირებით დამატებითი დეტალები ხდება ცნობილი. “კურიერის” ინფორმაციით, 36 წლის მამაკაცმა, დავით დვალიძემ ახალგაზრდა ქალს, სავარაუდოდ, 20-მდე ჭრილობა მიაყენა.
როგორც ცნობილია, ქალს ნაძალადევის რაიონში ოთახი ჰქონდა ნაქირავები, შემთხვევა სწორედ იქ მოხდა. სავარაუდოდ, კონფლიქტის ნიადაგზე 36 წლის დავით დვალიძემ ქალს სხეულის სხვადასხვა ადგილას მრავლობითი ჭრილობები მიაყენა. დანაშაულის ჩადენის შემდეგ მამაკაცი ადგილიდან მიიმალა.
როგორც თვითმხილველები ყვებიან, დაჭრილი ქალი ოთახიდან გამოვიდა და დახმარებას ითხოვდა. სასწრაფო სამედიცინო დახმარების ბრიგადამ ის კლინიკაში გადაიყვანა, მისი მდგომარეობა სტაბილურად მძიმეა.
“გოგონა წაიყვანეს გონებადაკარგული. ძალიან ბევრი ჭრილობა ჰქონდა მიყენებული, გადაიყვანეს საავადმყოფოში. დასვრილი იყო სისხლისგან,“ – ამბობს ერთ-ერთი თვითმხილველი.
პოლიციამ 36 წლის მამაკაცი უკვე დააკავა. მომხდარზე გამოძიება განზრახ მკვლელობის მცდელობის მუხლით მიმდინარეობს.