შერიგებისა და თანასწორობის საკითხებში ყოფილმა სახელმწიფო მინისტრმა პაატა ზაქარეიშვილმა ,,რესპუბლიკური პარტია” დატოვა. ამის შესახებ ინფორმაცია ,,პრაიმტაიმს” თავად პაატა ზაქარეიშვილს დაუდასტურა.
– ადასტურებთ ინფორმაციას იმის შესახებ, რომ დატოვეთ რესპუბლიკური პარტია?
– რამდენი ხანია…
– რატომ არ იყო ამის შესახებ ცნობილი?
– რა გითხრათ… ეს ჩემი ბრალი არ არის. ამის შესახებ საჯარო განცხადება არ გამიკეთებია, თუმცა ლიდერებისთვის ეს ცნობლი იყო…
– დავით უსუფაშვილის გადაწყვეტილების თაობაზე რა შეგიძლიათ გვითხრათ?
– ეს მოსალოდნელიც იყო. უფრო მეტიც, ჩემი აზრით, გარდაუვალიც კი გახდა, თუმცა ჩემგან განსხვავებით, ხმამაღლა არასდროს უთქვამს, რომ წავიდოდა.
– როცა თქვენ იყავით პარტიაში, მაშინ უკვე ჩანდა, რომ უსუფაშვილი დამოუკიდებელ პოლიტიკურ თამაშს დაიწყებდა?
– დაძაბულობა იზრდებოდა და ჩანდა, რომ იყო სხვადასხვა ხედვები. მე ამას, როგორც კონფლიქტოლოგი ისე გეუბნებით. ცხადი იყო, რომ დიდხანს ეს ვერ გაგრძელდებოდა. აშკარა იყო, რომ ხდებოდა პოზიციების პოლარიზაცია და არა ურთიერთდათმობა და ამისკენ ნაბიჯების გადადგმა. ეს ადრე თუ გვიან გასკდებოდა.
– ეს გარედანაც საგრძნობად თვალსაჩინო იყო, როცა მაგალითად ერთი და იგივე თემაზე უსუფაშვილის და ვთქვათ, დავით ბერძენიშვილის განცხადებები ერთმანეთს, ფაქტობრივად უპირისპირდებოდა ერთმანეთს…
– გეთანხმებით. მე მიკვირს კიდევაც ამდენ ხანს როგორც მოხერხდა ერთობის შენარჩუნება.
– ფიქრობთ, რომ უსუფაშვილი ახალი პარტიის შექმნას აპირებს?
– არ არის გამორიცხული. მას საკმაოდ დიპლომატიური და გაბუნდოვანებული განცხადებები ჰქონდა, თუმცა არ გამოირიცხა ეს.
– ასეთის შემთხვევაში, შეიძლება პაატა ზაქარეიშვილი მის ახალ გუნდში ვიხილოთ?
– ხშირად ვამბობ, არასდროს თქვა არასდროს, თუმცა ამ ეტაპზე მე სულ სხვა გამოწვევები მაქვს, ოჯახის მიმართ პასუხისმგებლობას ვგულისხმობ – სამსახური მაქვს საშოვნელი, ოჯახი მყავს სარჩენი…ანუ, თეორიულად – რატომაც არა, მაგრამ პრაქტიკულად იმდენი წინააღმდეგონა სეიძლება მქონდეს პირადად მე, რომ ამისთვის დრო არ მქონდეს. მინისტრობამ ძალიან დამაზარალა ეკონომიკურად და ახლა მინდა ოჯახსაც მივხედო. ასე რომ, ჯერ არ არის ჩემს პოლიტიკურ პერსპექტივებზე საუბრის დრო. უახლოეს ოთხ წელიწადში ჩანს, რომ გაგრძელდება ის პოლიტიკა რაც არის. რა ხასიათზე ვიქნები 4 წლის შემდეგ არ ვიცი, მაგრამ დღეს პარტიულობისკენ არ ვიყურები…
– უახლოესი 4 წლის პერსპექტივაში ის ჩანს, რომ დიდი გადახალისება მოხდება პოლიტიკურ ველზე…
– ძალიან მომწონს რაც ხდება… ქართული პოლიტიკური სპექტრი ყოველთვის იყო პოლარიზებული. ვიღაც ყოველთვის ებრძოდა ვიღაცას – ებრძოდნენ აბაშიძეს, გამსახურდიას, შევარდნაძეს, სააკაშვილს. ახლა აღარ ებრძვიან არავის. ერთი პარტია, ნაციონალური მოძრაობა ებრძვის მარტო ივანიშვილს. დანარჩენებში არ არის ბრძოლის მუხტი. აშკარად ჩანს, რომ ივანიშვილმა და ქართულმა ოცნებამ საზოგადოებას ახალი გამოწვევა დაუყენა, რომ მტერი აღარ არის პოლიტიკურ სპექტრში წამყვანი ძალა. ამიტომაც უცებ დაიბნა ხალხი, აღარ იცის რა ქნას, მათ შორის ისეთი გამოცდილი პოლიტიკური პარტია, როგორიც რესპუბლიკური პარტიაა… წლები იყვნენ პარტნიორები და ახლა ძნელია მკაფიოდ გამოკვეთილი პოზიტივის მიმართ გქონდეს გამოკვეთილად უარყოფითი დამოკიდებულება, დადებითს კი მიჩვეულები არ ვართ. მიჩვეულები არ ვართ კარგზე ვთქვათ კარგი, მაგრამ დავაფიქსიროთ, რომ განსხვავებული პოზიცია გვაქვს. მიჩვეულები ვართ ვთქვათ ცუდი, რომ მერე ჩვენს კარგობაზე ილაპარაკონ… ასე მოუვიდა თავისუფალ დემოკრატებსაც და რესპუბლიკელებსაც…
– თქვენ თქვით, რომ პარტიაში იზრდებოდა დაძაბულობა… როცა ეს ძაფი გაწყდა, რომლის პერსპექტივას უფრო ხედავთ – უსუფაშვილის, თუ რესპუბლიკური პარტიისას?
– რესპუბლიკური პარტია საკმაოდ ძლიერია, ღრმა ფესვები აქვს და ხელწამოსაკრავი ძალა არ არის. ამას ვამბობ იმის მიუხედავად, რომ ჩემი ადგილი ვეღარ ვნახე მათ სტრატეგიაში.
– რა სტრატეგიაა ასეთი? უსუფაშვილის შემთხვევაშიც, შეიქმნა შთაბეჭდილება, რომ კონკრეტული ფაქტი გახდა მისი გადაწყვეტილების მაპროვოცირებელი…
– არ გამოვრიცხავ… თუმცა, გულწრფელად გეტყვით, რომ არჩევნების შემდეგ არ მქონია კონტაქტი არცერთ რესპუბლიკელთან… მე დავასწარი პროცესებს, რადგან აღარ მინდოდა პარტიის მომავალზე მელაპარაკა, ვინაიდან არჩევნების შედეგიდან გამომდინარე მელაპარაკა… თუმცა, ამის მიუხედავად ვთვლი, რომ ისინი აუცილებლად დადგებიან ფეხზე, რადგან ღირებულებებზე დაფუძნებული პარტიაა. რაც შეეხება უსუფაშვილს, ის არის საქართველოსთვის საჩუქარი. მე მგონია, რომ ბოლო წლებმა ორი უნიკალური ფიგურა მოუვლინა საქართველოს. ეს არის ივანიშვილი და უსუფაშვილი და ძალიან გული მწყდება, რომ წინასაარჩევნო კამპანიამ ამ ორი ადამიანის ურთიერთობა გადაიყოლა
– გამორიცხავთ ამ ურთიერთობის განახლების პერსპექტივას?
– პოლიტიკაში არაფერია გამორიცხული… უსუფაშვილისთვის სახელმწიფოზე მაღლა არაფერი დგას, ისევე როგორც ივანიშვილისთვის. ორივეს ძალიან ახლოს ვიცნობ და ძალიან ვენდობი ორივეს.
,,პრაიმტაიმი”