„ქართული ოცნების“ გორის მუნიციპალიტეტის მერობის კანდიდატმა ვლადიმერ ხინჩეგაშვილმა მოსახლეობასთან შეხვედრები დაიწყო. მმართველი გუნდის მერობის კანდიდატი გორის მუნიციპალიტეტის სამ სოფელში: ატენში, ბოშურსა და ლევიტანაში იმყოფებოდა.
ხინჩეგაშვილმა ადგილობრივებს მუნიციპალიტეტისა და კონკრეტულად, ტანის ხეობის განვითარების მისეული ხედვა გაუზიარა. მოსახლეობამ მერობის კანდიდატთან სოფლებში არსებულ პრობლემებზე ისაუბრა. შეხვედრის მონაწილეებმა ამ პრობლემების დროულად და ეფექტიანად მოგვარებაზეც იმსჯელეს.
„ ჩვენს მუნიციპალიტეტში ტანას ხეობა ერთ-ერთი ულამაზესი ადგილია და შესაბამისად , ამ ხეობის ტურისტული პოტენციალი უსაზღვროა. ჩემი მერობის შემთხვევაში მაქსიმალურს გავაკეთებ , რათა ტანას ხეობა როგორც ადგილობრივი, ასევე უცხოელი ტურისტებისთვის მიმზიდველი გახდეს. ამისთვის კი მოსახლეობის ნდობა და მხარდაჭერაა საჭირო. ჩემთვის არ არსებობს ის ბარიერები, რომლებიც მოსახლეობას დამაშორებს. მივალ თითოეულ სოფელში, თითოეულ ოჯახში და ერთად დგომით შევქმნით უკეთეს ხვალინდელ დღეს.
ტანას ხეობაში მეგზურობა ადგილობრივი ხელისუფლების წარმომადგენლებმა და „ქართული ოცნებიდან“, ქვახვრელის, ბოშურის,ხიდისთავისა და ატენის ტერიტორიულ ერთეულში მაჟორიტარი დეპუტატობის კანდიდატმა ბორია გოგიჩაიშვილმა გამიწიეს. მინდა, ადგილობრივი თვითმმართველობის არჩევნებში წარმატებები ვუსურვო თითოეულ ჩვენს კანდიდატს“, – აცხადებს ხინჩეგაშვილი.