ავღანეთის დედაქალაქ ქაბულში მყოფი საქართველოს 16 მოქალაქე უკვე თვითმფრინავის ბორტზეა და ისინი სამშობლოში დღეს გამოფრინდებიან, – ამის შესახებ საქართველოს საგარეო საქმეთა მინისტრის მოადგილემ, ალექსანდრე ხვთისიაშვილმა ჟურნალისტებს განუცხადა.
„16 ქართველი იყო დარჩენილი ქაბულში. დღეს დილით მოხდა მათი უსაფრთხო გადაყვანა ნატოს სამხედრო ბაზაზე, აეროპორტში, შესაბამისად, ახლა მიდის პროცესი, ისინი სხდებიან თვითმფრინავში. ბრიტანელების მიერ არის უზრუნველყოფილი რეისი დუბაის მიმართულებით. ისინი გაფრინდებიან დუბაიში და სავარაუდოდ დღის განმავლობაში ჩამოფრინდებიან საქართველოში“, – აღნიშნა ხვთისიაშვილმა.
მისივე ინფორმაციით, ქაბულში დარჩენილი იყო სულ საქართველოს 24 მოქალაქე და ამ 16 ადამიანის გამოფრენის შემდეგ იქ ქართველები სავარაუდოდ აღარ დარჩებიან. ხვთისიაშვილის განმართებით, შესაძლოა, კიდევ იყოს ვინმე, თუმცა მათ უწყებისთვის არ მიუმართავთ და არც რეგისტრაციაზე დამდგარან.
მინისტრის მოადგილემ პარტნიორ ქვეყნებს დახმარებისთვის მადლობა გადაუხადა, მათ შორის თურქეთსა და ბრიტანულ მხარეს.