შინაგან საქმეთა სამინისტროს სასაზღვრო პოლიციის დელეგაცია თურქეთის რესპუბლიკაში სამუშაო ვიზიტით იმყოფებოდა. ვიზიტის ფარგლებში, გენერალ-მაიორი ნიკოლოზ შარაძე თურქეთის სანაპირო დაცვის ხელმძღვანელს, კონტრ-ადმირალ აჰმეთ ქენდირს შეხვდა.
შეხვედრას სასაზღვრო პოლიციის უფროსის მოადგილე გიორგი მალანია და სანაპირო დაცვის დეპარტამენტის დირექტორი, I რანგის კაპიტანი რამაზ პაპიძე დაესწრნენ.
შეხვედრაზე მხარეებმა საზღვაო უსაფრთხოების საკითხებსა და ორი ქვეყნის სანაპირო დაცვის დანაყოფებს შორის არსებული ორმხრივი ურთიერთობების გაღრმავებაზე ისაუბრეს.
სასაზღვრო პოლიციის უფროსმა თურქულ მხარეს სანაპირო დაცვის პირადი შემადგენლობის მომზადებისა და მცურავი საშუალებების ტექნიკური განახლების კუთხით გაწეული დახმარებისათვის მადლობა გადაუხადა.
ვიზიტის ფარგლებში, შინაგან საქმეთა სამინისტროს სასაზღვრო პოლიციის დელეგაციის წევრები ქალაქ სტამბოლში, თავდაცვის საერთაშორისო სამრეწველო გამოფენას (IDEF21) დაესწრნენ და უსაფრთხოების სფეროში არსებულ ტექნოლოგიურ სიახლეებს გაეცნენ. საერთაშორისო გამოფენა, რომელიც წელს მეთხუთმეტედ ჩატარდა, თურქეთის შეიარაღებული ძალების ფონდის მიერ ორ წელიწადში ერთხელ იმართება და თავისი მასშტაბით მსოფლიოს წამყვან ოთხეულშია.