”ქართული ოცნების” აღმასრულებელი მდივნის ირაკლი კობახიძის განცხადებით, სამთავრობო გუნდის დაკომპლექტება და მასში ცვლილებების განხორციელება პრემიერ-მინისტრის პრეროგატივაა და ამაზე კომენტარს სწორედ პრემიერი გააკეთებს.
ირაკლი კობახიძის ინფორმაციით, ”ქართულ ოცნებას” აქვს კონკრეტული გეგმა, რომლითაც ხელისუფლების ყველა ორგანო იმოქმედებს.
”ჩვენ გვაქვს კონკრეტული გეგმა, რომელიც ასახულია ჩვენს წინასაარჩევნო პროგრამაში და ხელისუფლების ყველა ორგანო იმოქმედებს ამ გეგმის, წინასაარჩევნო პროგრამის შესაბამისად. ეს არის ძალიან ამბიციური და ამავდროულად რეალისტური დოკუმენტი”, – განაცხადა ”ქართული ოცნების” აღმასრულებელმა მდივანმა.
ირაკლი კობახიძემ ”ნაციონალური მოძრაობის” განცხადებასაც უპასუხა, რომლის თანახმადაც ოპოზიცია მარნეულის მაჟორიტარული ოქლის უბნების ხელახლა დათვლას ითხოვს.
”არჩევნებმა ჩაიარა აბსოლუტურად თავისუფალ, სამართლიან და მშვიდ გარემოში. ეს არის ის მიღწევა, რომელიც მოიტანა საქართველოში ”ქართული ოცნების” ხელისუფლებამ. შესაბამისად, ყოველგვარი კითხვის ნიშნების დასმა ამ არჩევნებთან დაკავშირებით, არასწორია და სპეკულაციაა”, – აღნიშნა კობახიძემ.