ეს ყველამ უნდა წიკითხოს – ამ სათაურით გაზეთი “კვირის პალიტრა“ სტატიას აქვეყნებს.
გამოცემასთან, დედა, რომლის შვილმაც ონლაინ კაზინოების გამო სამჯერ სცადა თვითმკვლელობა, შემაძრწუნებელ ამბავს ჰყვება.
„კარგი განათლება მაქვს მიღებული და ალბათ კარიერაც კარგი მექნებოდა, რომ არა შვილები – სამი შვილი ერთიმეორის მიყოლებით გამიჩნდა და როცა მათ ვუცქერდი, ვფიქრობდი, ამათ აღზრდაზე უკეთესი რა უნდა გავაკეთო, შინ დავჯდები, არ ვიმუშავებ და ყველაფერს ვიღონებ, გზას არ ასცდნენ-მეთქი. მაგრამ მაინც ვერ ავიცილე უბედურება… ნიჭიერებით ყველაზე გამორჩეული შვილი ამიცდა გზიდან, ახლა კი ისეთ დღეშია, მასზე ლაპარაკიც მრცხვენია.
სკოლის წარმატებით დამთავრებისთანავე მოხვდა უნივერსიტეტში. ერთადერთი ის მაფიქრებდა, რომ კომპიუტერთან ზომაზე მეტხანს იჯდა; თუმცა ვფიქრობდი, მისი ტოლებიც ასე არიან, როცა მუშაობას დაიწყებს, სხვა საქმეზე გადაერთვება-მეთქი. ის კი, თურმე, ჩემ თვალწინ ონლაინ კაზინოში თამაშობდა და ქვეყანა თავზე მენგრეოდა.
ერთ საშინელ დღეს, როცა უნივერსიტეტის პირველ კურსზე იყო, ეს ყველაფერი გავიგე. იმ დღეს შინიდან არც კი გაუხედავს, სულ კუდში დამდევდა. გავუჯავრდი, – ამხელა ბიჭი რა პატარა ბავშვივით დამყვები, თუ რაიმე გინდა, მითხარი-მეთქი და… აცახცახებულმა ამოილუღლუღა – დე, დიდი ვალი მაქვსო. მეგონა, ხუმრობდა, მაგრამ რომ შევხედე, მივხვდი, არ ტყუოდა – ზეწარივით იყო გაფითრებული. რომ არ წავქცეულიყავი, სკამი თავად გამომიწია, დამსვა და მითხრა, – ონლაინ კაზინოში 3.000 ლარი წავაგე, ვალი თუ არ გადავიხადე, მომკლავენო. ასე დაიწყო ჩემი უბედურება“,– აცხადებს ქალბატონი და ამბობს, რომ აღნიშნული თანხა ისესხა, რადგან იცოდა, რომ წინააღმდეგ შემთხვევაში მის შვილს მოკლავდნენ.
„ვისესხე, რადგან ვისი ვალიც ჰქონდა, მართლა მოკლავდა და შვილი როგორ გამეწირა! მაშინ ვერაფრით წარმომედგინა, რომ შვილს ამ უბედურებიდან ვერ გამოვიყვანდი, მაგრამ ვერ შევძელი. იმდენად ჩაეფლო თამაშში, რომ ორჯერ თავად მივიყვანე ფსიქიატრიულ საავადმყოფოში, საიდანაც უარესი გამოვიდა.
ამჯერად გასაყიდი აღარაფერი მაქვს. როცა ფული ვეღარ ვიშოვე და საბოლოოდ უარი ვუთხარი, გავიდა სამზარეულოში, პურის საჭრელი დანა გამოიტანა და ჩემ თვალწინ გადაისერა მაჯა. იქიდან სისხლი თქრიალით რომ წამოვიდა, კინაღამ შევიშალე. სანამ “სასწრაფო” მოვიდოდა, შეშლილივით დავკიოდი თავზე… საავადმყოფოდან რომ დაბრუნდა, როგორც კი შინ მარტო დამიგულა, მეორე ხელი გადაისერა – იმდენი ვალი მაქვს, სანამ სხვა მომკლავს, თავად მოვიკლავ თავსო.
მართლა იყო ამის გამკეთებელი და მეც რა მექნა, კიდევ ერთხელ ჩავუვარდი ნაცნობებს ფეხებში, – მიშველეთ, თავს მოიკლავს, იქნებ საბოლოოდ დამეხმაროთ, ნუ დაიდებთ ჩემი შვილის ცოდვას-მეთქი… ფული მომცეს, მაგრამ ჩემი არსებობაც დაივიწყეს, აღარც მესალმებიან… ეს უბედურება ამით არ დამთავრებულა – მესამედ რომ გადაიჭრა ვენები, ფსიქიატრიულ საავადმყოფოში ისევ წავიყვანე. მითხრეს, – პაციენტი ჩვენს მკურნალობას არ ემორჩილება, არაფერი ეშველებაო. ამიტომ წავედი, ნაცნობი ექთნისგან ვენების გაკერვა ვისწავლე, სამედიცინო ნემსი და ძაფი ვიყიდე და როცა ვენები ისევ გადაიჭრა, თავად გავუკერე. ამ სიტუაციაში სხვა რა დამრჩენია. ხანდახან ვფიქრობ, მეც გადავიჭრი ვენებს და ამით დავამთავრებ ყველაფერს-მეთქი, მაგრამ მერე ჩემი შვილი?! მასზე ფიქრმა მიხსნა გაგიჟებისგანაც. თუმცა რახან გიჟი არ ვარ, იმასაც ვხვდები, რომ ერთხელაც იქნება, ჩემი შვილიც ყველაფერს დაამთავრებს და მეც.
მაგრამ მანამდე მის გადარჩენას კიდევ ვცდი და ახალ ხელისუფლებას მივმართავ – ჩემსავით გამწარებული დედები შეიცოდოს და რახან მკვლელი ონლაინ კაზინოების დახურვა ვერ მოახერხეს, ჩემი შვილისთანა გაუბედურებულებს შეზღუდვები დაუწესონ თამაშზე – როგორც ბანკები არ აძლევენ ე.წ. გაშავებულ კლიენტებს სესხს, იქნებ ონლაინ კაზინოებმაც დაბლოკონ ხალხი, რომელთაც მათი წყალობით არაფერი დარჩენიათ, თავის მოკვლის გარდა“, – აცხადებს ქალბატონი.