ქვემო ქართლის ყოფილი გუბერნატორი, ლევან მამალაძე “პირველთან” საუბარში, გარიგებაზე საუბრობს, რომელიც მისი მტკიცებით, საქართველოს ყოფილ და მოქმედ პრეზიდენტებს შორის შედგა.
მამალაძე აცხადებს, რომ მან საქართველოს პრეზიდენტს, გიორგი მარგველაშვილს შეწყალების თხოვნით მიმართა, თუმცა მას რეაგირება მიხეილ სააკაშვილთან შეთანხმების გამო არ მოუხდენია.
“პრეზიდენტს რომ მივმართე, უარი ოფიციალურად არ უთქვამს, არანაირი რეაგირება არ მოახდინა. ტელეფონით ვესაუბრე და მან პოლიტიკური მოტივების გამო შეიკავა თავი. სააკაშვილს ჩემი განადგურება უნდოდა. ამიტომ გამივრცელა ჭორები, რომ ჩემზე უარყოფითი საზოგადოებრივი აზრი შეექმნა. მისმა პროკურატურამ ვერაფერი რომ ვერ იპოვა, ჩემი ოფიციალური დეკლარაცია გამოაცხადა უკანონოდ და ჩემი დევნა დაიწყეს.
2012 წლიდან, პროკურატურას ყველა მასალა წარვუდგინეთ. პროკურატურაში დღესაც სააკაშვილის ზონდერები მუშაობენ და ამიტომ არის ჩემი საქმე დღემდე რეაგირების გარეშე – განუცხადა “პირველს” მამალაძემ.
მისი თქმით, პრეზიდენტის რეზიდენციასთან, 2014 წელს, მისი შეწყალების მოთხოვნით, მხარდამჭერები შეიკრიბნენ, საუბარია დაახლოებით 1500 ადამიანზე.
“ისინი ითხოვდნენ, რომ მარგველაშვილი სააკაშვილის გავლენის ქვეშ არ მოქცეულიყო. ზუსტი ინფორმაცია მაქვს, რომ სააკაშვილმა პრეზიდენტი გააფრთხილა ჩემს შეწყალებაზე ეთქვა უარი. წინააღმდეგ შემთხვევაში, სააკაშვილის გუნდი პრობლემებს შეუქმნიდა და “ქართულ ოცნებასთან” კონფლიქტში მას მხარს არ დაუჭერდა. ამის გამო დავურეკე გიორგი მარგველაშვილს, რომ სააკაშვილისთვის არ მოესმინა და კონსტიტუციით მინიჭებული უფლებები შეესრულებინა. ვუთხარი, რომ ჩამოვიდოდი ღია სასმართლოს გასამართად და ჩემი საქმე სააკაშვილის გასამართლებით დასრულდებოდა.
პრეზიდენტს სწორედ ამის შეეშინდა – მითხრა, რომ მისი პირადი აზრი არის, შეიწყალოს მხოლოდ პატიმრები და პოლიტიკურ თემებში ჩარევას არ აპირებს. ამ განცხადებით, პრეზიდენტმა სააკაშვილის მოთხოვნა შეასრულა და ჩემს განცხადებაზე არანაირი ოფიციალური რეაგირება არ გაუკეთებია. მარგველაშვილს ახლაც უდევს ჩემი განცხადება უამრავი თანდართული მასალით. თუ ამის გაკეთება სურდა, 3 წლის განმავლობაში რამეს მოუმოქმედებდა”, – განუცხადა “პირველს” მამალაძემ.
ცნობისთვის, ქვემო ქართლის ყოფილ გუბერნატორი ლევან მამალაძე უკვე 13 წელია, დონბასში ცხოვრობს. ლევან მამალაძეს სააკაშვილის დროინდელი გამოძიება ქრთამის აღებასა და უკანონო შემოსავლების ლეგალიზაციაში ადანაშაულებს. მას სასამართლომ დაუსწრებლად პატიმრობა შეუფარდა და ძებნაში გამოაცხადა.
წყარო: http://pia.ge/