სანამ გამოძიება სასტიკი რიტუალური მკვლელობის დეტალებს გაასაჯაროებს, საზოგადოება ცდილობს, თავად უპასუხოს შეკითხვებს. ამ პროცესში არაერთი, შესაძლოა, აბსურდული ვერსიაც კი ჩნდება, იკვეთება სხვადასხვა მოტივი და ირკვევა დეტალები, რომელიც კიდევ უფრო მეტ კითხვას აჩენს.
„პრაიმტაიმი“ შეეცადა, ყველა ინფორმაცია შეეკრიბა მკვლელობის რამდენიმე შესაძლო სცენარის მისაღებად. ჩვენ შევეცდებით, ოფიციალური და არაოფიციალური ინფორმაციებისა და „პრაიმტაიმის“ ანონიმური წყაროების დახმარებით, ის სავარაუდო სურათი დავხატოთ, რომლის მიხედვითაც განსაკუთრებული სისასტიკის ჯგუფური მკვლელობა განხორციელდა.
გამოძიების ოფიციალური ინფორმაციით: „სამმა ბრალდებულმა – ირინა ყოჩიაშვილმა, ბექა შენგელიამ და არასრულწლოვანმა ნინა ჩ.-მ წინასწარ შემუშავებული გეგმის მიხედვით, 76 წლის ლუბა ყოჩიაშვილი განსაკუთრებული სისასტიკით მოკლეს. ჯერ ელექტროშოკით გათიშეს, შემდეგ გაგუდეს და ყელი გამოსჭრეს. გვამი მთაწმინდაზე, ვეძინის ქუჩაზე, ერთ-ერთი ბრალდებულის, ბექას შენგელიას ნაქირავებ ბინაში ჩანთით გადაიტანეს და დაანაწევრეს. დანაწევრებული გვამი გლდანის ნაგავსაყრელზე აიტანეს და დაწვეს“.
გამოძიება ამბობს, რომ ეს რიტუარული მკვლელობა იყო, თუმცა რაიმე სახის მტკიცებულებებს ჯერჯერობით არ ასაჯაროებს.
ცნობილია, რომ ლუბა ყოჩიაშვილსა და ბრალდებულ ირინა ყოჩიაშვილს, ანუ დედა-შვილს შორის მკვლელობამდე უთანხმოება და დაპირისპირება იყო.
იმ ინფორმაციაზე დაყრდნობით, რომელიც „პრაიმტაიმმა“ მეზობლებისგან მიიღო, დედა-შვილს შორის დაძაბული ურთიერთობა, სავარაუდოდ, მას შემდეგ დაიწყო, რაც ირმა ყოჩიაშვილმა ბექა შენგელია გაიცნო. „პრაიმტაიმის“ ინფორმაციით, ლუბა ყოჩიაშვილმა იცოდა, რომ ბექა შენგელიას უჩვეულო დაჯგუფებებთან, იგივე სექტებთან ჰქონდა კავშირი და შვილს მასთან მეგობრობას უშლიდა.
მეზობლების ინფორმაციით, ბექა შენგელია და ირმა ყოჩიაშვილი შეყვარებულები იყვნენ. ირმა ყოჩიაშვილი ხშირად მიდიოდა ბექასთან და რჩებოდა კიდეც მასთან. სავარაუდოა, რომ სწორედ ბექასთან ურთიერთობა გახდა იმ დაპირისპირების მიზეზი, რომელიც ლუბასა და ირმა შორის მკვლელობამდე დაიწყო და რომელზეც გამოძიება ოფიციალურ ვერსიაშიც წერს. მოკლულის მეზობლები მკვლელობის სხვა მოტივზეც საუბრობენ. ერთ-ერთი მეზობლის თქმით, რომელიც ვინაობის გამხელისგან თავს იკავებს, ამბობს, რომ ირმა ყოჩიაშვილს ფსიქოლოგიური პრობლემები ჰქონდა, სიმარტოვეს განიცდიდა და როგორც ოჯახის, ისე საზოგადოების მხრიდან მხარდაჭერა სჭირდებოდა. შესაძლებელია, სწორედ ეს გარიყულობისა და უიმედობის შეგრძნება გამხდარიყო კიდეც იმ დანაშაულის მაპროვოცირებელი, რომელიც მან მეგობრებთან ერთად ჩაიდინა.
„ბავშვს ჰქონდა სულიერი სიმარტოვე. ყურადღება და სითბო სჭირდებოდა. ეს არის ფსიქოლოგიური მომენტი და ჩაითრია სექტამ“.
ბექა შენგელიას კარის მეზობლის მტკიცებით, ირმა ყოჩიაშვილმა თქვა:
„დიდი სიამოვნებით დავაჭერი ის თითები, რომლითაც მცემდა“.
გავყვეთ მოვლენებს ქრონოლოგიურად. 19 ოქტომბერს 19 წლის ირმა ყოჩიაშვილი, თავის მეგობრებთან, 23 წლის ბექა შენგელიასთან და 17 წლის ნინა ჩ.-სთან ერთად, მივიდა მშობლების – ლუბა და ომარ ყოჩიაშვილების სახლში, ბერ გაბრიელ სალოსის 5 ნომერში. სავარაუდოდ, მოვლენები შემდეგ ასე განვითარდა: მათ ლუბა ყოჩიაშვილი ელექტროშოკით ჯერ გათიშეს, შემდეგ გაგუდეს და, როგორც გამოძიება ამტკიცებს, დანის დარტყმით მოკლეს. მოგვიანებით, კვალის დაფარვის მიზნით, გვამი ჩანთაში მოათავსეს, ეზოში ჩაიტანეს და ტაქსით, თბილისში, მთაწმინდაზე, ბექა შენგელიას ნაქირავებ ბინაში გადაიტანეს.
ბექა შენგელიას ბინა ვეძინის ქუჩაზე მდებარე იტალიური ეზოს ნახევარსარდაფია. ოთახს ეზოს მხრიდან შესასვლელი კარი და ერთი ფანჯარა აქვს, ისიც ეზოს მხარეს. ბინა პატარა შესასვლელისა და ერთი ოთახისგან შედგება. ბრალდებული ბექა შენგელია აღნიშნულ ბინაში სულ რაღაც სამი კვირის გადასული იყო. სავარაუდოდ, მან ბინა რიტუალური მკვლელობისთვის დაიქირავა.
მას შემდეგ, რაც სამმა მეგობარმა, გამოძიების მიხედვით, ლუბა ყოჩიაშვილი მოკლა, გვამი სახლიდან მთაწმინდაზე გადაიტანეს. მოკლულის მეუღლე სახლში დაბრუნდა, კარი – ღია, ხოლო სახლი ცარიელი დახვდა. ლუბა ყოჩიაშვილი დაკარგულად გამოაცხადეს. მეზობლების ინფორმაციით, ბრალდებული ირმა ყოჩიაშვილი დედის ძებნის პროცესში აქტიურად იყო ჩართული.
„ლუბას დაკარგვის შესახებ რომ ინფორმაცია გავრცელდა, მოვიდა, უჯრები გადაქექა და თქვა, რომ მწვანე „პლაში“ და „ბასანოჩკები“ ჩაუცვამს და ისე წასულაო. რას მოვიფიქრებდით, თვითონ თუ იყო მკვლელი. კარგად იცოდა, დედამისს რა ჩააცვა“.
როგორც ზემოთ აღვნიშნეთ, ბრალდებულებმა გვამი ბექა შენგელიას სახლში წაიღეს და საზარელი სცენარი განახორციელეს. ბექა შენგელიას სახლის დათვალიერებისა და იქ ამოღებული ნივთმტკიცებებზე დაყრდნობით, ახალი მოტივიც გამოიკვეთა – კანიბალიზმი.
პოლიციამ ბექა შენგელიას სახლიდან, მეზობლების ცნობით, სისხლიანი ტაფები და ქვაბები ამოიღო.
„სულ 34 ნივთმტკიცება გაიტანეს სახლიდან. ტაფები, ქვაბები და ჯამები წაიღეს. თქვეს, რომ გულ-ღვიძლი შეჭამეს. დაუჯერებელია, არ ვიცი, მაგრამ ამბობენ, რომ ოთახში წყლის ნიჟარაც სისხლიანი იყო“, – ამბობს ბექა შენგელიას მეზობელი ნატა.
„პრაიმტაიმისთვის” ბრალდებულის ერთ-ერთ ადვოკატზე დაყრდნობით ცნობილი გახდა ისიც, რომ დაკავებულებმა კანიბალიზმიც აღიარეს, ანუ გარდაცვლილი ქალის შინაგანი ორგანოები ჯერ შეწვეს და შემდეგ შეჭამეს.
კრიმინალურმა პოლიციამ ბექა შენგელიას ბინა დაათვალიერა და 34 სამხილი ამოიღო. ვარაუდობდნენ, რომ მოკლულის შიგთავსი ბრალდებულებმა ტუალეტში ჩარეცხეს, თუმცა პოლიციამ ამის დამადასტურებელი ვერანაირი სამხილი ვერ აღმოაჩინა.
გავყვეთ მოვლენების ქრონოლოგიას. იმავე საღამოს, ანუ 19 ოქტომბერს დაბინდების შემდგომ, ბრალდებულებმა დანაწევრებული გვამი ორი ჩანთის მეშვეობით გლდანის #8 საპყრობილის მიმდებარედ არსებულ გაუქმებულ ნაგავსაყრელზე გადაიტანეს, წინასწარ მოცემული დანაშაულის ჩადენის მიზნით შეძენილი ბენზინი გადაასხეს, ცეცხლი წაუკიდეს და კვალის დასაფარად, თხრილში დაწვეს. ვრცელდება ინფორმაცია, რომ ბრალდებულებმა დანაწევრებული გვამის დაწვის პროცესი კამერით გადაიღეს.
გამოძიებამ მკვლელობა დაახლოებით ორი კვირის შემდეგ გახსნა და ამ მკვლელობაში მონაწილე ბრალდებულ პირებთან ერთად, კიდევ ორი პირი – 22 წლის ავთანდილ ა. და 23 წლის დათა კ. დააკავა, ამავე მკვლელობის შეუტყობინებლობისა და დანაშაულის დაფარვის ბრალდებით. ამ დრომდე უცნობია, როგორ შეიტყვეს დაკავებულებმა იმ მკვლელობის შესახებ, რომელიც ირმამ, ნინამ და ბექამ, გამოძიების მიხედვით, დაგეგმეს და განახორციელეს. სავარაუდოა, რომ დაკავებულები ბრალდებულებს დანაწევრებული გვამის ერთი ადგილიდან მეორეში გადაადგილების დროს ეხმარებოდნენ.
ჩატარებული საგამოძიებო მოქმედებების დროს მკვლელობის, გვამის დანაწევრებისა და დაწვის ადგილები დაათვალიერეს, საიდანაც ამოიღეს უმნიშვნელოვანესი მტკიცებულებები, დაიკითხნენ მოწმეები, ჩატარდა არაერთი და მათ შორის, გენეტიკური (დნმ) ექსპერტიზა, ამოღებულია ვიდეოჩანაწერები და სხვა. გამოძიება დამამძიმებელ გარემოებაში ჯგუფურად ჩადენილი განზრახ მკვლელობის, დანაშაულის დაფარვისა და დანაშაულის შეუტყობინებლობის ფაქტზე, საქართველოს სისხლის სამართლის კოდექსის 108-ე, 109-ე მუხლის მე-2 ნაწილით, 375-ე და 376-ე მუხლებით მიმდინარეობს“, – აღნიშნულია შს სამინისტროს განცხადებაში.
უკვე ცნობილია, რომ მთავარი ბრალდებული, ირმა ყოჩიაშვილი მოკლული ლუბა ყოჩიაშვილის ბიოლოგიური შვილი არ იყო. ყოჩიაშვილების ოჯახს დაახლოებით 20 წლის წინათ ტრაგედია დაატყდა თავს, 19 წლის გოგონა ლეიკემიით გარდაეცვალათ და მას შემდეგ ლუბა ყოჩიაშვილმა ჩვილი გოგონა იშვილა, მას სახელად ირმა დაარქვეს.
„ლუბასა და ომარის შვილი უკვე ძალიან ცუდად იყო, იცოდა, რომ კვდებოდა და თავის მშობლებს სთხოვა: რომ მოვკვდები, ბავშვი აიყვანეთ, თქვენნაირი მშობლების ისე დარჩენა არ შეიძლებაო“, – უთხრა „პრაიმტაიმს“ ერთ-ერთმა მეზობელმა.
უნდა აღინიშნოს, რომ „პრაიმტაიმთან“ მოკლულსა და მის მეუღლეს ყველა დადებითად ახასიათებდა. ლუბა ყოჩიაშვილი სამხატვრო აკადემიის ლექტორი იყო, მისი მეუღლე ომარ ყოჩიაშვილი კი – საავიაციო ინჟინერი. მეზობლების თქმით, მოკლული ლუბა ყოჩიაშვილი გოგონას გვერდიდან არ იშორებდა. რაც შეეხება ირმას, ის, მეზობლების თქმით, არავის ემეგობრებოდა არც სკოლაში და არც სამეზობლოში და ჩაკეტილი ცხოვრებით ცხოვრობდა.
„ძალიან კარგი მშობლები იყვნენ, ძვირფასი ცოლ-ქმარი, წლებია აქ ვცხოვრობ და ვიცნობ, გოგონას
ცივ ნიავს არ აკარებდნენ, არაფერი აკლდა. დედამისი გვერდიდან არ იცილებდა, სადაც არ უნდა წასულიყო, ყველგან დაჰყავდა. თვითონ ბავშვი კარჩაკეტილი იყო, არავის ემეგობრებოდა“, – ამბობს ლუბა ყოჩიაშვილის მეზობელი.
ერთ-ერთი მეზობლის ინფორმაციით, ირმა ყოჩიაშვილი ბავშვობაში სპორტს მისდევდა, ჩოგბურთზე დადიოდა, თუმცა შემდეგ თამაშსაც თავი დაანება:
„ჩემს შვილიშვილთან ერთად ჩოგბურთზე დადიოდა, ძალიან კარგი და წყნარი ბავშვი იყო, მაგრამ შემდეგ ჩოგბურთის დარბაზი დახურეს და მასაც ვარჯიში არ გაუგრძელებია. მერე მოხდა ისე, რომ შეიცვალა“.
გოგონას რადიკალური ცვლილება მე-11 კლასიდან დაიწყო. საინტერესოა დეტალი, რომ ირმა ყოჩიაშვილმა მშობლების მიერ დარქმეული სახელი გადაირქვა და მარიამი დაირქვა. 2 წლის წინათ მშობლების სახლიც დატოვა და როგორც მეზობლები ამბობენ, მეგობარ გოგოსთან ერთად ცხოვრობდა, თან მუშაობდა. მეზობლების თქმით, უცნაურად იცვამდა და ტატუებსაც იკეთებდა. ამბობენ, რომ ცუდ წრეში მოხვდა. მეზობლების თქმით, გოგონამ იცოდა, რომ ნაშვილები იყო და უკავშირდება თუ არა ეს მის რადიკალურ ცვლილებას, ვერ ადასტურებენ.
„მე-11 კლასიდან შეიცვალა. იცვამდა შავ ტანსაცმელს, ელასტიკებს, ტატუები გაიკეთა. სხეულზე ადგილი აღარ ჰქონდა, სანამ მკვლელობას ჩაიდენდა, იქამდე სახეზე კატის ულვაშების ტატუ გაიკეთა. შუბლზეც კი ტატუ ჰქონდა, თმაგადაპარსული დადიოდა. მას შემდეგ, რაც მშობლების სახლში აღარ ცხოვრობდა, მაინც ხშირად მოდიოდა ხოლმე. ძირითადად, ტაქსით მოძრაობდა. ადრე მიდიოდა და ღამით მოდიოდა“.
მეზობლების თქმით, ირმა ყოჩიაშვილი გოთების სუბკულტურის მიმდევარი იყო და „უცნაური“ სამეგობრო ჰყავდა.
„მინახავს შეკრებებზე გოთებთან ერთად, სხვადასხვა პარკში“.
მეზობლები ადასტურებენ, რომ ამ ცვლილებების გამო მას მშობლებთან კონფლიქტი ჰქონდა.
„ჩემს დედამთილთან მეგობრობდა და იმასთან ამბობდა, რომ ძალიან ღელავდა ირმაზე, ცუდ წრეში მოხვდაო. ლუბას უთქვამს, აკადემიაში როგორ სტუდენტებს ვზრდიდი და შენ ვერ მოგერიეო“.
მანამ, სანამ მკვლელობა მოხდებოდა, ლუბა ყოჩიაშვილმა თირკმლის ოპერაცია გაიკეთა, წოლითი რეჟიმები დაუნიშნეს. მეზობლების ინფორმაციით, შვილი ხშირად მოდიოდა და დედას უვლიდა.
„მიუხედავად იმისა, რომ მშობლებთან აღარ ცხოვრობდა და მათთან კონფლიქტიც ჰქონდა, დედასთან მოდიოდა და უვლიდა“.
ყოჩიაშვილების ერთ-ერთი მეზობელი უმრავლესობისგან განსხვავებულ პოზიციას აფიქსირებს. მისი თქმით, მარიამი, იგივე ირმა, კეთილი ადამიანი იყო და ის მკვლელად საზოგადოებამ აქცია.
„ერთ დღეს ეზოში ვიჯექი და დავინახე, მარიამს ნაგავი მიჰქონდა ბუნკერში ჩასაყრელად. ამ ბავშვზე ბევრს საუბრობდნენ, უცნაური გახდაო, შეიცვალაო და მეც დავინტერესდი, რომ დავლაპარაკებოდი. ვკითხე, – შენ მარიამი არ ხარ, ჩოგბურთზე რომ დადიოდი-მეთქი? გაუხარდა, რომ ვიცანი და ვიღაც ადამიანურად დაელაპარაკა. ისე გაუხარდა, რომ ვიღაცამ სითბო აგრძნობინა. აქ რომ მოდიოდა, ეზოში მასზე ყველა ცუდად ლაპარაკობდა. კი იყო შეღებილი და უცნაური ფორმით, მაგრამ ეგ არაა მთავარი, ამ ბავშვს ჰქონდა სულიერი სიმარტოვე. ეს არის ფსიქოლოგიური მომენტი და ჩაითრია სექტამ“.
მკვლელობასთან დაკავშირებით ირმა ყოჩიაშვილის მამამ, ომარ ყოჩიაშვილმა ჟურნალისტებთან პირველი კომენტარი გააკეთა.
ომარ ყოჩიაშვილი მომხდარით შოკირებულია და აცხადებს, რომ დაკავებულებიდან არც ერთს არ იცნობს.
„ჩემს შვილს ვერაფერს ვამჩნევდი, არ მეგონა, თუ ასეთი სასტიკი იქნებოდა. რა ვთქვა, ან რა გითხრათ? როგორ ვიქნები? დაკავებულებიდან არავის ვიცნობ. ჩემს სახლში ისინი არასდროს მინახავს“, – ამბობს ომარ ყოჩიაშვილი.
მისივე თქმით, ირმა ყოჩიაშვილს სახაზინო ადვოკატი იცავს.
რაც შეეხება ბექა შენგელიას, მას სოციალურ ქსელში Sailer-ად იცნობენ. საინტერესო დეტალია, რომ ბექა შენგელია მაისში „გია ჯაჯანიძის შოუში“ იყო მიწვეული და სექტანტებზე საუბრობდა. მკვლელობასაც სექტისთვის დამახასიათებელ რიტუალს უკავშირებენ.
ბექა შენგელიას მეზობლების თქმით, მას სასიამოვნო და კულტურულ ახალგაზრდად იცნობდნენ.
„დილით მიდიოდა და საღამოს მოდიოდა ხოლმე. ყოველთვის გამარჯობას ამბობდა და ზრდილობიანი ბიჭის შთაბეჭდილებას ტოვებდა. ამის გამკეთებელი თუ იყო, რას ვიფიქრებდით“, – ამბობს ბექა შენგელიას მეზობელი, რომელიც ვინაობის დასახელებისგან თავს იკავებს.
შეგახსენებთ, რომ ბექა შენგელია მთაწმინდის ბინაში, სულ რაღაც, სამი კვირის გადასული იყო.
წყარო: „პრაიმტაიმი“