მიხეილ სააკაშვილის ჯანმრთელობაზე ყოველდღიური დღის წესრიგის აწყობა შეურაცხმყოფელია, იქიდან გამომდინარე, რომ ამ ადამიანს, დამნაშავეს საქართველოში სრულად რეფორმირებული პენიტენციური დაწესებულება დახვდა, სადაც თითოეული პატიმრის ჯანმრთელობაზე ზრუნავენ, – ამის შესახებ ჟურნალისტებს პარლამენტის აგრარული კომიტეტის თავმჯდომარემ, ნინო წილოსანმა განუცხადა.
მისი თქმით, მიხეილ სააკაშვილი საკუთარი შიმშილობით მანიპულირებს, მხოლოდ იმიტომ, რომ საკუთარი ამომრჩევლის ემოციებზე იმოქმედოს.
„სახელმწიფო სტრუქტურები ყველაფერს გააკეთებენ იმისთვის, რომ მისი ჯანმრთელობა მაქსიმალურად იყოს დაცული. მის პროვოკაციებზე მეტი ყურადღების გამახვილება არ ღირს. რაც შეეხება მიხეილ სააკაშვილის მიმართ საზღვრის უკანონოდ კვეთის ბრალდებას, ფაქტობრივად, მიხეილ სააკაშვილი არის მოარული კანონდარღვევა და კაცი დანაშაული, რომლის საქართველოში დაბრუნებაც კანონმდებლობის დარღვევასთან იყო დაკავშირებული. დარწმუნებული ვარ, ასე ლაჩრულად და სამარცხვინოდ კონტეინერში, რძის პროდუქტებთან ერთად ქვეყანაში შემოსვლა არც მისი ამომრჩევლისთვის იყო მისაღები“, – განაცხადა წილოსანმა.