გორის სამხედრო ჰოსპიტალში მოთავსებულ მიხეილ სააკაშვილთან დღის მეორე ნახევარში ჯანდაცვის სამინისტროს მიერ შექმნილი კონსილიუმის წევრები შევლენ. მანამდე, მას, სავარაუდოდ, პირადი ექიმი ნიკოლოზ ყიფშიძე მოინახულებს.
ამ დროისთვის, მას უკვე ჩაუტარდა გარკვეული ლაბორატორიული კვლევები და მათი პასუხების ნაწილიც ცნობილია. მიხეილ სააკაშვილის პირადი ექიმის, ნიკოლოზ ყიფშიძის ექიმის თქმით, პაციენტის მდგომარეობა რთულია და განსაკუთრებული მეთვალყურეობა სჭირდება.
„დღეს უნდა დაიწყოს მკურნალობა. ბევრი რამ უნდა ჩაუტარდეს. ამ დრომდე ჩატარებული ტესტებით, მისი მდგომარეობა ისეთივე მძიმეა, როგორიც იყო“, – აცხადებს ნიკოლოზ ყიფშიძე „ქრონიკასთან“ საუბრისას.
მისივე თქმით, დღეს სააკაშვილთან ნევროლოგი, ნუტრიციონისტი და რეანიმატოლოგი შევლენ.
„ქრონიკა“ კონსილიუმის წევრ ნინო შარაშენიძესაც ესაუბრა.
„უნდა გავეცნოთ ლაბორატორიული კვლევის შედეგებს, გადავცეთ ჩვენი გამოცდილება, რაც ვიმუშავეთ პაციენტთან, გავიგოთ, რა გეგმა აქვთ მათ, სჭირდებათ თუ არა ჩვენი კონკრეტული რჩევა „გაიდლაინის“ ფარგლებში, მისთვის საჭირო სქემის შედგენაში“, – აცხადებს ნინო შარაშენიძე.
ამ დროისთვის, მიხეილ სააკაშვილის გორის ჰოსპიტალის ინტენსიურ განყოფილებაშია. კლინიკის ბაზაზე, სულ 5 ფლიგელია. „ქრონიკის“ ინფორმაციით, ერთი, მე-4 კორპუსი სრულად ეთმობა სააკაშვილის ჯანმრთელობაზე ზრუნვას.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვდნენ, იუსტიციის სამინისტრო კი აცხადებდა, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.