პრეზიდენტ სააკაშვილის ფარული ხარჯები და შავი ბუღალტერია – რა უჯდებოდათ გადასახადის გადამხდელებს ექსპრეზიდენტის, მისი უახლოესი გარემოცვისა და ოჯახის წევრების გართობა.
9 მილიონის საქმეზე ყოფილ პირველ პირს ბრალდება ჯერ კიდევ 2014 წელს წარედგინა. ახლა სასამართლომ უნდა დაადგინოს და განაჩენი სხვა საქმეებთან ერთად ამ ეპიზოდზეც უნდა გამოუტანოს. დანაშაული შვიდიდან თერთმეტ წლამდე პატიმრობას ითვალისწინებს.
გრიფით საიდუმლოს სტატუსი აქვს 2010 წლის 14 სექტემბრით დათარიღებულ დოკუმენტს, რომელიც მიხეილ სააკაშვილის უფროსი ვაჟის სწავლების საფასურს ასახავს. 14 ათას ლარს სახელმწიფო დაცვის სპეციალური სამსახური გივი ზალდასტანიშვილის სახელობის ამერიკულ აკადემიაში რიცხავს. ეს არის ერთი წლის სწავლის საფასური, საერთო ჯამში კი გასაიდუმლოებული ხარჯთაღრიცხვით კარგად ჩანს, რომ ედუარდ სააკაშვილის სწავლება სახელმწიფო ბიუჯეტს 51 100 ლარი დაუჯდა. კვალის დაფარვის მიზნით, თანხები საქართველოს პრეზიდენტის ადმინისტრაციიდან არ იხარჯებოდა, სამაგიეროდ ამას ფარული და აუცილებელი ხარჯის სტატუსით ის უწყება აკეთებდა, რომელიც მაშინ სახალხო კონტროლს არ ექვემდებარებოდა.
შვილების განათლების გარდა, სააკაშვილის ფარული ხარჯების სქემით პრეზიდენტის და მისი ოჯახის წევრების მოგზაურობაც საქართველოს მოქალაქეების ჯიბიდან ფინანსდებოდა. მაგალითისთვის, 2010-2012 წლებში ედუარდ სააკაშვილისთვის 108 343 ლარი, ნიკოლოზ სააკაშვილისთვის 61 709 ლარი, ყოფილი პირველი ლედისთვის 209 205 ლარი, გიული ალასანიასთვის 3355 და სააკაშვილის ბებიისთვის, მზია წერეთლისთვის კი 3698 ლარი გამოიყო. გამოდის, რომ ორ წელიწადში ბრალდებული სააკაშვილის ოჯახის წევრების მოგზაურობა სახელმწიფო ბიუჯეტს 400 ათას ლარამდე დაუჯდა.
სახელმწიფო ბიუჯეტი თანხები დაიხარჯა დავით ბაქრაძისთვის, ლევან ვარშალომიძისა და რაფაელ გლუკსმანისთვისაც. სააკაშვილმა 2012 წლის მარტში ტაილანდში მათთან ერთად გართობასა და დასვენებაში 100 ათას ლარამდე დახარჯა. ექსპრეზიდენტის გარემოცვამ ძვირადღირებულ სასტუმრო ამანპურში ორი ღამე გაატარა – ვიზიტის მიზეზი უცნობია.
გასაახალგაზრდავებელ და თავის მოვლის პროცედურებზე სააკაშვილი საზღვარგარეთ ხშირად დადიოდა – 26 მაისის აქციის დარბევიდან 5 დღის შემდეგ, 31 მაისს პრეზიდენტი სააკაშვილი მილანს ესტუმრა, სადაც სახის პროცედურებში 6 ათასი ევრო გადაიხადა. დოქტორ ჯანლუკა პადილიოს მომსახურებით ბრალდებულმა სააკაშვილმა 2012 წელსაც ისარგებლა, რაც სახელმწიფო ბიუჯეტს 2750 ევრო დაუჯდა.
გამოძიებამ აუდიტორებისა და ექსპერტების ჩართულობით დაადგინა, რომ ამ სქემით, სააკაშვილმა პრეზიდენტობის მეორე ვადის პერიოდში 8 837 461 ლარი გაფლანგა.