დეპუტატმა დავით ზილფიმიანმა დღეს პარლამენტის სხდომაზე განაცხადა, რომ მისი კუთვნილი კომპანიის „სტერეო +“-ის დარბევის საქმეზე პროკურატურამ დაზარალებულად ცნო.
„მე ვიცი რომ ბევრი თქვენგანი როგორც პოზიციიდან ასევე ოპოზიციიდან გულშემატკივრობდით „სტერეო პლიუსის“ საქმეს, რომელიც 2012 წელს დაარბიეს. 9 წელიწადნახევარი გავიდა და როგორც იქნა გასულ კვირას გვაღიარეს დაზარალებულად.
პერსონალურ, პირადულ საუბრებში „ნაცმოძრაობის“ ბევრი ყოფილი და დღევანდელი წევრისგან მომისმენია სინანული ამ ფაქტზე, მაგრამ „ისტებლიშმენტს“ ეს არ გაუკეთებია. დანაშაულების გადაცდომებით შენიღბვა საზოგადოებაში უფრო მეტ აგრესიას იწვევს. ამის მაგალითი იყო გუშინდელი დღეც. იმ პერიოდში როდესაც სააკაშვილის ნებართვის გარეშე შემოდგომაზე ხიდან ფოთოლიც ვერ ჩამოვარდებოდა, ვისი დავალებით მიიყვანეს შინაგან საქმეთა სამინისტროს ძალები კომპანიის დასარბევად, რომლებმაც „მგლების“ ფორმაში გადაცმულებმა მთლიანად მოახერხეს კომპანიის დარბევა? იმედი მაქვს კიდევ 9 წელი არ გაგრძელდება ეს საქმე და მომავალ წელს მაინც ნახოს სინათლე.
ეს მდგომარეობა რომელშიც ვიმყოფებით, ცალსახად მიუთითებს იმას, რომ „სტერეო პლიუსის“ დარბევის საქმეში მონაწილე წევრები რომელთა ოდენობაც დიდი იყო, ვგულისხმობ შემსრულებლებს, მათი განთავისუფლება სასჯელისგან და მეორეს მხრივ არაღიარება იმისა რომ ვიღაცისგან მოდიოდა ეს ბრძანება, დიდ წინააღმდეგობას ქმნის.
ამიტომ მხოლოდ სინანული და აღიარება ზოგიერთი წევრისგან, მათ შორის ჩვენებების საფუძველზე, რომელსაც მუდმივად ახორციელებენ ამ პროცესზე სხვადასხვა მოწვეული ძირითადი საგანი უნდა ყოფილიყო ამის დროულად დასამთავრებლად. თუმცა სჯობს გვიან ვიდრე არასდროს. რადგან პირველი ნაბიჯი გადაიდგა და იქნებ ბოლომდე მივიდეს“ – განაცხადა დეპუტატმა.