ქუთაისის ვიცემერობის ყოფილმა კანდიდატმა, იმედა კლდიაშვილმა პარტია “გირჩი – მეტი თავისუფლება” დატოვა.
გადაწყვეტილების შესახებ პოსტი Facebook-ზე გამოაქვეყნა და მხარდაჭერისთვის საზოგადოებას მადლობა გადაუხადა.
“ამ ადგილობრივი არჩევნების პერიოდში ბევრი რამ მოხდა, ბევრი რამ გავიგე ახალი და საკმარისი გამოცდილებაც მივიღე, რომ რაღაც დასკვნები გამეკეთებინა.
ახლა ახალი ეტაპი იწყება – არჩევნების მერე პერიოდი. პირადად მე არჩევანი უნდა გამეკეთებინა, გავაგრძელებდი თუ არა “გირჩი – მეტი თავისუფლების” პოლიტიკოსად პოზიციონირებას და ზოგადას პარტიულ საქმიანობას.
1. პოლიტიკოსობას და ზოგადად პარტიულ საქმიანობას დიდი რესურსი ჭირდება, როგორც დროითი, ასევე ფინანსური რაც სამწუხაროდ ამ ეტაპზე მე არ მაქვს.
2. იყო აზრობრივი განსხვავებები როგორც საარჩევნო პერიოდში მიღებულ გადაწყვეტილებებზე, ასევე, როგორი უნდა იყოს განვითარების შემდეგი ეტაპები.
მოკლედ, ბევრი რომ არ გავაგრძელო, ვტოვებ “გირჩი – მეტი თავისუფლებას”. დიდი მადლობა ყველას, ვინც მხარს მიჭერდით ჩემი ამ აქტიურობის პერიოდში”, – წერს კლდიაშვილი სოციალურ ქსელში.