უკვე ევროპაშიც გამოვლინდა შემთხვევები. ვიცით, რომ 40 წლამდე ახალგაზრდებში განსაკუთრებით არის გავრცელებული. კარგს, ალბათ, არ უნდა ველოდოთ იმ მხრივ, რომ გადამდებლობა იქნება მაღალი, – ამის შესახებ ციციშვილის კლინიკის სამედიცინო დირექტორმა მაია ჩხაიძემ „ომიკრონის“ შტამზე საუბრისას განაცხადა.
„საქართველოში, ამჟამად, „დელტა“ შტამი ცირკულირებს. ალბათ, უკვე სეზონური გრიპიც შემოვა. ამ დროისთვის, ჩვენთან 92 პაციენტი წევს. მათი უმეტესობა წლამდე ასაკის ბავშვია“, – აღნიშნა ჩხაიძემ.
ნოემბრის ბოლოს, სამხრეთ აფრიკაში, მეცნიერებმა განაცხადეს, რომ კორონავირუსის ახალი ვარიანტი აღმოაჩინეს, რომელსაც უამრავი მუტაცია აქვს. ჯანდაცვის მსოფლიო ორგანიზაციის მთავარმა მეცნიერმა, სუმია სვამინატანმა განაცხადა, რომ ახალ ვარიანტს სპაიკის პროტეინში არაერთი შემაშფოთებელი მუტაცია აქვს.