“გუბაზ სანიკიძემ “ეროვნული ფორუმი” დატოვა და ახლა დიდი ოპოზიციური მოძრაობის დაწყებას აანონსებს – მისი განცხადებით, ამ მიზნით კონსულტაციების გამართვას უახლოეს მომავალში გეგმავს“, – წერს გაზეთი “კვირის პალიტრა” სტატიაში სათაურით “ჩვენ არა ვართ გვირილები, რომ პოლიტიკიდან გავქრეთ” / “საბანი ყველას არ ეყო. ახლა დასკვნების დროა!” / “თუ წარუმატებელი აღმოჩნდა ჩემი ინიციატივა, უნდა დავრჩე თუ არა პოლიტიკაში, ამას პირადად გადავწყვეტ და სხვის აზრს არ გავითვალისწინებ”.
“არჩევნები დასრულდა და მომავალი ოთხი წლის პოლიტიკური ვითარება გარკვეულია, გადაწყვეტილებაც ამ გარემოებამ მიმაღებინა. ფაქტია, “ქართულ ოცნებას” საკონსტიტუციო უმრავლესობა აქვს, რაც “ნაცმოძრაობასთან” ერთად უსისხლო სახელმწიფო გადატრიალებით მოახერხა. რა თქმ უნდა, “ქართული ოცნება~ გაურიგდა “ნაციონალურ მოძრაობას” – ორივე პარტიას ცხვირ-პირზე ეტყობა. თუმცა ეს პროცესი მარტივად არ დასრულდება: ჩვენ არა ვართ გვირილები და პოლიტიკიდან არ გავქრებით. ყველაფერი იქით მიდიოდა – დანარჩენი პარტიები უნდა დასჯილიყვნენ და გარეთ დარჩენილიყვნენ”, -აცხადებს გამოცემის კორესპონდენტთან საუბრისას გუბაზ სანიკიძე.
“კოალიციაში “ფორუმი” სანიმუშოდაც კი იქცეოდა – გარეთ პრობლემები არ გამოგვქონდა, თუმცა შიგნით არაერთი პრინციპული საკითხი დაგვიყენებია – სასამართლოში მურუსიძის დანიშვნაზე და ა.შ. განაწყენებულიც რომ ვიყო, ახლა ამას რა აზრი აქვს?! სხვა რამეზე ვწუხვარ – როგორ განვითარდება მოვლენები, არავინ იცის… დავით უსუფაშვილსა და ნინო ბურჯანაძესთან უკვე მქონდა კონსულტაციები. დავით უსუფაშვილმა თქვა, რომ ის თანამშრომლობას გააგრძელებს და მართლაც, ჩვენ არაერთ საკითხზე საერთო პოზიციები გვექნება. პირადად მე ახალი პარტიის შექმნას არავის ვთავაზობ, ჯერ აუცილებელია ვითარების ობიექტურად შეფასება. კონსულტაციებს ვგეგმავ პერსონებთან და არა პარტიებთან, თუმცა კონკრეტულად ვისთან, მომავალი გვიჩვენებს. მხოლოდ “ნაციონალურ მოძრაობასა” და “ქართულ ოცნებასთან” თანამშრომლობას გამოვრიცხავ”, – განაგრძობს რესპონდენტი და შეკითვას – “კოლეგებისთვის ადრეც მიგიმართავთ, თუმცა მათგან პოზიტიური გამოხმაურება არ მიგიღიათ. არჩევნების შემდეგ ბლოკების გაერთიანების ინიციატივითაც გამოხვედით და არც ამაზე დაგთანხმდნენ. ამჯერად “ფორუმიდან~ წამოსულ გუბაზ სანიკიძეს რა პოლიტიკური რესურსი აქვს, რის გამოც კოლეგები კონსულტაციებზე უნდა დათანხმდნენ?” – პასუხობს:
“ახლა მათ როგორც ერთი პირი, ისე ვხვდები. როცა პარტიის წევრი ხარ, გარკვეული პასუხისმგებლობაც გაკისრია. ახლა ჩემს ქმედებაზე – რამეს გავაფუჭებ თუ გამოვაკეთებ, მხოლოდ პირადად ვაგებ პასუხს. ბანაკი არ დამიცია და არც ციხესიმაგრე ამიშენებია, მე ვარ ერთი ადამიანი და ჩემ გარშემო უნდა მოხდეს ყველაფერი-მეთქი, ამის პრეტენზია არა მაქვს, თუმცა ხელს შევუწყობ, რომ ადამიანებმა ერთმანეთთან ურთიერთობა გაარკვიონ. ამ დრომდე ყველა პოლიტიკური სპექტრი თავისთვის იქაჩებოდა, საბანი კი ყველას არ ეყო. ახლა დასკვნების დროა – რაც არ გამოდის ცალ-ცალკე, იქნებ ერთად გავაკეთოთ. ნებისმიერ მოქალაქეს ანგარიშს გავუწევ და მათ გადაწყვეტილებასაც უპირობოდ მივიღებ. თუმცა, თუ წარუმატებელი აღმოჩნდა ჩემი ინიციატივა, უნდა დავრჩე თუ არა პოლიტიკაში, ამას პირადად გადავწყვეტ და სხვის აზრს არ გავითვალისწინებ”.