მადლობა, რომ შთამომავლობას ასეთი არაჩვეულებრივი ცხოვრების მაგალითი დაუტოვეთ… – ასე ემშვიდობება ტრანსპორტისა და კავშირგაბმულობის ყოფილი მინისტრი მერაბ ადეიშვილი ცნობილ ლოტბარს, ანსამბლ “ერისიონის” ხელმძღვანელს, ჯემალ ჭკუასელს, რომელიც დღეს გარდაიცვალა.
“ბატონი ჯემალ ჭკუასელი! არც მეტ არც ნაკლები ქართველი ერის საგანძური! ასეთი ადამიანები არ უნდა მიდიოდნენ და არც მიდიან! მათ იმდენი შექმნეს, იმდენი იღვაწეს, იმდენი დატოვეს, ისეთი სისხლსავსე ცხოვრებით იცხოვრეს, რომ არსადაც არ მიდიან, უბრალოდ მოგვენატრებიან…
ფენომენალური სიმღერა, შესანიშნავი ლოტბარი, საოცარი ორგანიზატორი, უდიდესი იუმორი, არაჩვეულებრივი და ხალისიანი მოსაუბრე, ბრწყინვალე თამადა….
კიდევ უამრავი საოცარი თვისება შემიძლია ამ უნიჭიერესი ადამიანის ჩამოვთვალო, მაგრამ მას ჰქონდა ერთ-ერთ მთავარი და უნიკალური შარმი: იყო ყველაზე მაგარი გურული და იყო ყველაზე მაგარი თბილისელი…
ამიტომაც იყო თევზივით წყალში ნებისმიერი ასაკის და ნებისმიერი რანგის საზოგადოებაში… ამიტომაც მოგვცა ყველას უფლება თავი მის მეგობრად ჩაგვეთვალა…
რამდენი რამ ვისწავლეთ მისგან, რამდენი არაჩვეულებრივი საღამო უჩუქებია და როგორ იხარჯებოდა ბოლომდე, შეეძლო თუ არ შეეძლო, მუდამ ხალისიანი და სიცოცხლისთვის შემართული….
მთელი დარჩენილი ცხოვრება ხომ ჩვენთან დარჩება თქვენი არაჩვეულებრივი შემოქმედება, თქვენი განუმეორებელი ისტორიები და იუმორი….
მადლობა ბატონო ჯემალ, მადლობა ყველაფრისათვის, მადლობა იმისთვის, რომ გვქონდა თქვენთან ასეთი ურთიერთობის ფუფუნება…
მადლობა, რომ შთამომავლობას ასეთი არაჩვეულებრივი ცხოვრების მაგალითი დაუტოვეთ…
დამდგარ სიცარიელეს ერთ დიდებული ქართული შეფასება ცოტას თუ შეეხიდება ხოლმე: ვალმოხდილი მამულიშვილი!💔🙏🙏🙏….”, – წერს სოციალურ ქსელში მერაბ ადეიშვილი.