“ზურაბ ჟვანია ჩემთან მოვიდა და მითხრა, ეს “ვარდების რევოლუცია” მომაცილე თავიდანო,” – აღნიშნული განცხადება მწერალმა, ირაკლი კაკაბაძემ “ჯორჯიან თაიმსის” გადაცემაში “რეალური პოლიტიკა” სტუმრობისას გააკეთა.
კაკაბაძე გარდაცვლილ პრემიერთან პირად საუბარს იხსენებს და ამბობს, თუ როგორ გააფრთხილა ის ზურაბ ჟვანიამ, რომ ფრთხილად ყოფილიყო.
“7 თუ 9-ში ზუსტად აღარ მახსოვს, ბატონი ზურა ამოვიდა და ძალიან არ მომეწონა მისი გამომეტყველება. მარტო ამოვიდა, დაცვა არ ახლდა და ძალიან დაღლილი სახე ჰქონდა. რომ დავჯექით და ჭიქა წავაქციეთ, ნუ, მამიდამისი გარდაიცვალა და იქ ვიყავით ყველანი… ჭიქა, რომ წავაქციეთ, მერე უცებ გამიყვანა ერთი წუთით და მკითხა რას აკეთებთო რა, მაშინ ბილ კელი ჩამოგვყავდა და მკითხა, რა ხდებაო… ალბათ, მე დამპატიჟეო, მაგრამ ვერ მოვალო.
ვკითხე, ზურა რა ხდება მეთქი და მითხრა: “არ მინდა, ეს “ვარდების რევოლუცია” მომაცილე თავიდანო. მე ვუთხარი, რა ხდება ზურა მეთქი და აი, პირდაპირ გეტყვიო: აღარ მინდა აქ მუშაობაო, ვაფშე აღარ მინდა აქ ყოფნაო. აქაურობა გადაიქცა იარაღის მაფიად. საქართველოს მთავრობა იარაღის მაფიის ცენტრიაო. ღამ-ღამობით იკრიბებიანო და რა იარაღი სად გაყიდონ და როგორ იბარიგონო ამაზე მსჯელობენო. თემურა იქ ზისო და ამას ხელმძღვანელობსო და შენ ფრთხილად იყავიო! აქეთ გამაფრთხილა მე,” – განაცხადა ირაკლი კაკაბაძემ.