ვაქცინაციის წამახალისებელი კამპანიის – „ავიცრათ ერთმანეთისთვის“ ფარგლებში მიმდინარე პროექტს – „პანდემია, მსოფლიო და ისტორია“ ინფლუენსერები, ბლოგერები, საზოგადოებრივი აზრის ლიდერები, ასევე, სხვადასხვა სფეროს წარმომადგენლები შეუერთდნენ.
პარლამენტის ეროვნული ბიბლიოთეკის ინიციატივითა და კომპანია „ქოლგას“ ორგანიზებით განხორციელებული პროექტის ფარგლებში, სასტუმრო „თეორიაში“ მსოფლიოში სხვადასხვა დროს არსებული პანდემიის ამსახველი ფოტოისტორიები გამოიფინა.
გაიმართა საინიციატივო ჯგუფის შეხვედრაც, სადაც მონაწილეებმა იდეები გაცვალეს და კამპანიის სამოქმედო გეგმასა და ღონისძიებებზე, ასევე დაწესებულ რეგულაციებსა და უსაფრთხო ზომებზე ისაუბრეს. გამოფენისა და სამუშაო შეხვედრის შემდეგ, საინიციატივო ჯგუფის წევრებმა მომდევნო შეხვედრაც დააანონსეს, რომელიც, მათი განცხადებით, უფრო მასშტაბური იქნება.
პარლამენტის ეროვნული ბიბლიოთეკის დირექტორის მოადგილე მირიან ხოსიტაშვილი პროექტის მნიშვნელობაზე საუბრობს და აღნიშნავს, რომ საინფორმაციო ხასიათის გამოფენები 2022 წლიდან გაგრძელდება.
„სასტუმრო თეორიაში მოეწყო ჩვენი გამოფენის „პანდემია, მსოფლიო და ისტორია“ შემაჯამებელი გამოფენა. ის ეძღვნება პანდემიების ისტორიას, რომლებიც ვითარდებოდა მსოფლიოში და ძალიან ბევრი ადამიანის სიცოცხლე შეიწირა. მნიშვნელოვანია, რომ ჩვენ წარმოვადგინეთ ისტორიული დოკუმენტები, თუ როგორ ებრძოდა კაცობრიობა სხვადასხვა დროს სხვადასხვა პანდემიას. 2022 წლიდან კიდევ უფრო აქტიურად გავაგრძელებთ საზოგადოების სხვადასხვა წარმომადგენელთან შეხვედრას“, – განაცხადა მირიან ხოსიტაშვილმა.
სტრატეგიული კომუნიკაციების ექსპერტი, კომპანია Influencer.ge-ის დამფუძნებელი ნინა პერტენავა აცხადებს, რომ პანდემიის დასასრულებლად მნიშვნელოვანია საზოგადოებისთვის სწორი ინფორმაციის მიწოდება.
„პანდემია დაძლევადია და ჩვენი შეხვედრები სწორედ ამას ემსახურება, რომ ჩვენ სწრაფად დავასრულოთ პანდემია. ამისთვის კი საჭიროა სწორი ინფორმაციის მიღება – ზრუნვით და სიყვარულით“,- ამბობს ნინა პერტენავა.
პროექტის საინფორმაციო მხარდამჭერია კომპანია „ქოლგა“. როგორც კომპანიაში აცხადებენ, გამოფენა საქართველოს ათივე რეგიონში გაიმართა და დიდი მოწონება დაიმსახურა.
„მოხარული ვარ, რომ გამოფენამ, რომელმაც საქართველოს 10-ვე რეგიონი მოიარა და დიდი ინტერესი გამოიწვია, დღევანდელ შეხვედრაზეც დიდი მოწონება დაიმსახურა. დამსწრე საზოგადოების მიერ ძალიან ბევრი საინტერესო იდეა გახმიანდა და აღინიშნა, რომ ეს უნიკალური საარქივო მასალა საზოგადოებისთვის მაქსიმალურად უნდა იყოს ცნობილი, რადგან ის იმ მოვლენებს ეხება, რაც ჩვენმა წინაპრებმა დაძლიეს და მათი მაგალითებით უნდა შევძლოთ დღეს არსებული გამოწვევის, რომელსაც კოვიდპანდემია ეწოდება, გამკლავება. მნიშვნელოვანია ისიც, რომ, ამ ისტორიული ფაქტების მონაცემებით, სხვადასხვა პერიოდში გავრცელებული პანდემიები სწორედ ვაქცინაციის პროცესით იქნა დაძლეული”, – განაცხადა ანა ჩანგიანმა.
