გორის სამხედრო ჰოსპიტლიდან რუსთავში გადაყვანილი მიხეილ სააკაშვილი ადვოკატებმა №12 პენიტენციურ დაწესებულებაში მოინახულეს.
მისმა ერთ-ერთმა ადვოკატმა ნიკა გვარამიამ მედიასთან თქვა, რომ სააკაშვილის მდგომარეობა კვლავ მძიმეა და ის ისევ მკურნალობას საჭიროებს.
„ეს კაცი აქ ყალბი დიაგნოზით იმყოფება, ვითომ გამოჯანმრთელებულია და, სინამდვილეში, იმაზე უარესადაა, ვიდრე აქედან წავიდა. მისმა ექიმებმაც აღნიშნეს, რომ იგი იმავე წონით დაბრუნდა, რითაც გავიდა, რაც გულისხმობს იმას, რომ „რეფიდინგით“ მისი აღდგენა არ მომხდარა. წოლისგან და იმ რეჟიმისგან, რომელშიც გორში იყო, აქვს კუნთების მოდუნება და განლევა. გულწრფელად უნდა ვთქვათ, რომ გორის ჰოსპიტალი მიხეილ სააკაშვილისთვის აღმოჩნდა ერთადერთი დანიშნულების დაწესებულება, რომ იგი არ მომკვდარიყო, კაპტოპრილით ემკურნალა და მისთვის წნევა დაეწიათ. ეს არის და ეს. იქ მეტი არაფერი მომხდარა“, – აცხადებს გვარამია.