საქართველოს მთავრობა უკრაინის მოქალაქეების დახმარებას განაგრძობს. 250-ზე მეტი უკრაინელი ტურისტი, რომლებიც ამ ეტაპზე სამშობლოში დაბრუნებას ვერ ახერხებენ, სასტუმროებში სრულიად უსასყიდლოდ განთავსდნენ. პრემიერის გადაწყვეტილებით, ყველა უკრაინელი ტურისტი, ვინც სამშობლოში ვერ ბრუნდება, საქართველოს სასტუმროებში უსასყიდლოდ რჩებიან.
„საქართველოში დასასვენებლად ჩამოვედით, 24-ში უკვე გავიგეთ ეს საშინელი ამბავი. ჩავვარდით პანიკაში, აღარ ვიცოდი სად წავსულიყავით, უკრაინაში ფრენები აღარაა. გუდაურის სასტუმროს მენეჯერი დაუკავშირდა ტურიზმის ადმინისტრაციას და უკვე ადმინისტრაცია დაგვეხმარა თბილისში სასტუმროში განთავსებაში, უზრუნველყოფილი ვიქნებით უფასო საცხოვრებლით და კვებით, და ეს ძალიან მნიშვნელოვანია. ასე მგონია მხოლოდ ქართველი ხალხი გაგვიგებს ჩვენ ამ სიტუაციაში, თქვენ გესმით ჩვენი და მხარს გვიჭერთ და მინდა გამოვხატო უდიდესი მადლიერება ამ მხარდაჭერისთვის და განსაკუთრებით მადლობა ტურიზმის ადმინისტრაციას, ჩვენი ახლობლები უკრაინაში ჩვენზე მაინც არ ნერვიულობენ, აქ მშვიდობიანად ვართ“, – აცხადებს უკრაინელი ტურისტი ოლგა ბროვარნიკი.