პარლამენტის მიერ უკრაინისთვის შეგროვებული სამედიცინო დანიშნულების ჰუმანიტარული ტვირთი საქართველოს წითელი ჯვრის საზოგადოებას გადაეცა.
ჰუმანიტარული ტვირთი წითელი ჯვრის საზოგადოებას, პარლამენტის თავმჯდომარემ შალვა პაპუაშვილმა, თავმჯდომარის მოადგილემ დავით სერგეენკომ და ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ გადასცეს.
დავით სერგეენკოს განცხადებით, პარლამენტი უკრაინის მხარდაჭერას მომავალშიც გააგრძელებს.
„საქართველოს პარლამენტი გვერდით უდგას უკრაინელ ხალხს. რა თქმა უნდა, ჩვენ ძალიან მძიმედ განვიცდიდით იმას, რაც ახლა ხდება უკრაინაში. იღუპება მშვიდობიანი მოსახლეობა, ქალები და ბავშვები. ჩვენ ვაკეთებთ ყველაფერს. რაც ჩვენს შესაძლებლობებშია. დღეს გავაგზავნეთ პირველი პარტია პირველადი გადაუდებელი სამედიცინო მოხმარების ტვირთის, რომელშიც დაგვეხმარა საქართველოს წითელი ჯვარი. რა თქმა უნდა, ეს მხარდაჭერის აქცია გრძელდება. გახსნილია ანგარიში პარლამენტის წევრებისთვის, პარლამენტის აპარატის თანამშრომლებისა და ყველა მსურველისთვის. ჩვენ ამ მხარდაჭერას მომავალშიც გავაგრძელებთ. იმედი მაქვს, რომ ომი მალე დამთავრდება, თუმცა ეს მხარდაჭერა უკრაინას კიდევ დაჭირდება“, – აღნიშნა დავით სერგეენკომ.
დიმიტრი ხუნდაძის განცხადებით, პარლამენტი ჰუმანიტარული დახმარებას უკრაინაში კიდევ გააგზავნის.
„პარლამენტის წევრებმა და პარლამენტის აპარატის თანამშრომლებმა საკუთარი დანაზოგიდან შევაგროვეთ თანხა და შევიძინეთ ჰუმანიტარული ტვირთის სახით ის საჭირო სამედიცინო პრეპარატები და სახარჯი მასალები, რაც საბრძოლო მოქმედებების დროს ყველაზე მეტად არის საჭირო. ტრანსპორტირებაში დაგვეხმარება საქართველოს წითელი ჯვრის საზოგადოება. ჩვენ ამ აქციას გავაგრძელებთ და საჭიროების მიხედვით, პერიოდულად, გავაგზავნით ტვირთს ჰუმანიტარული დახმარების სახით. ეს მხარდაჭერა იქნება იქამდე, სანამ ჩვენს უკრაინელ მეგობრებს დახმარება დასჭირდებათ. ვიტოვებ იმედს, რომ ომს ძალიან მალე მშვიდობა ჩაანაცვლებს“, – აღნიშნა ჯანმრთელობის დაცვისა და სოციალურ საკითხთა კომიტეტის თავმჯდომარემ.
საქართველოს წითელი ჯვრის საზოგადოების პრეზიდენტმა თავის მხრივ აღნიშნა, რომ უკრაინაში ჰუმანიტარული დახმარება ხვალ გაიგზავნება.
„საქართველოს წითელი ჯვრის საზოგადოება აგრძელებს უკრაინაში ხალხის დახმარებას. ჩვენ მჭიდროდ ვთანამშრომლობთ უკრაინის წითელ ჯვართან. უკრაინაში ვაგზავნით საქართველოს წითელი ჯვრის მანქანებს, სადაც შექმნილია ლოჯისტიკური ჰაბი და შემდგომ უკვე უკრაინის წითელი ჯვრის საზოგადოება დაარიგებს ტვირთს ქვეყნის მასშტაბით“, – აღნიშნა ნათია ლოლაძემ.