ომის მე-18 ღამე უკრაინაში – დაბომბილი ქალაქები და სამოქალაქო ობიექტები. საოკუპაციო ძალებმა საჰაერო თავდასხმა განახორციელეს ლვოვთან ახლოს, სადაც უკვე რამდენიმე საათია განგაშის სიგნალია ჩართული. ერთ-ერთი იერიშის სამიზნე სამშვიდობო და უსაფრთხოების საერთაშორისო ცენტრი გახდა. გავრცელებული ინფორმაციით, მათ 8 რაკეტა ისროლეს.
ომის დაწყებიდან დღემდე, რუსეთს ლვოვი არ დაუბომბავს, პოლონეთის საზღვართან ახლოს მდებარე ქალაქი უკრაინის მოსახლეობის ევაკუაციის მთავარი წერტილია, საიდანაც ისინი ევროპის სხვა ქვეყნებში გადადიან. დაიბომბა მონასტერი ქალაქ სვიატოჰირსკში, რომელსაც 520 ადამიანი აფერებდა თავს, მათ შორის 200 ბავშვი. ბრძოლები იყო ხერსონის ოლქშიც.
გავრცელდა უკრაინის პრეზიდენტის კიდევ ერთი განცხადება, რომელშიც ზელენსკი მსოფლიოს მიმართავს.
“გრძელდება ბრძოლა ჩვენი თავისუფლებისთვის, ჩვენი სამშობლოსთვის, მიწისთვის, უკრაინელი ერის გადარჩენისთვის. რუსი ოკუპანტები ვერ შეძლებენ ჩვენს დაპყრობას, მათ არ აქვთ შესაბამისი სიძლიერე და სულისკვეთება, ისინი დგანან მხოლოდ ძალადობაზე, მხოლოდ ტერორზე, იარაღზე, რომელიც ბევრი აქვთ, მაგრამ ოკუპანტებს არ აქვთ ნორმალური ცხოვრების ბუნებრივი საფუძვლები, იმისათვის, რომ ადამიანებმა ბედნიერება განიცადონ და იოცნებონ, მათ ორგანულად არ შეუძლიათ ცხოვრება ნორმალური გახადონ. ყველგან, სადაც რუსეთმა სხვის მიწაზე შეაბიჯა, ოცნებები შეუძლებელია. მინდა მივმართო მსოფლიოს – ბოროტება, რომელიც მიზანმიმართულად ბომბავს მშვიდობიან ქალაქებს, ბოროტება, რომელიც სასწრაფო დახმარების მანქანებსაც კი ესვრის და ანგრევს საავადმყოფოებს, ვერ შეჩერდება ერთ ქვეყანაში, თუ მას ექნება ძალა, უფრო შორს წავიდეს. ჩვენს ერს ვერავინ დაამარცხებს,”-განაცხადა ვოლოდიმირ ზელენსკიმ.