ვითარება დრამატულია, ნამდვილად არასახარბიელო, თუმცა მე-18 დღეა მიმდინარეობს წინააღმდეგობა უკრაინის თავდაცვის ძალებისა, – ამის შესახებ უკრაინაში მყოფმა სამხედრო მიმომხილველმა, გიორგი ცხვიტავამ „ქრონიკას“ განუცხადა. მისივე ინფორმაციით, სამხედრო ობიექტს, სადაც სამშვიდობო მისიებისთვის ჯარისკაცებს ამზადებდნენ, 8 რაკეტა ესროლეს.
„ადგილობრივი დროით დილის 06:00 საათზე სულ მცირე 8 აფეთქების ხმა გაისმა ლვოვის ჩრდილოეთით. აქ არის განლაგებული სამხედრო ობიექტი, სადაც სამშვიდობო ძალებისთვის ჯარისკაცების მომზადება მიმდინარეობს. საუბარია იმაზე, რომ 8 რაკეტა ესროლეს ამ ობიექტს, რომელიც არის სამშვიდობო ეგიდით, იმიტომ რომ სამშვიდობო მისიებისთვის ამზადებს ჯარისკაცებს. მსხვერპლის შესახებ ინფორმაცია არ ვრცელდება. გუშინდელი დღიდან ვითარება აბსოლუტურად შეიცვალა. მოგეხსენებათ, რომ პოლონეთის საზღვრიდან დაახლოებით 70 კილომეტრში მდებარეობს ქალაქი ლუცკი, რომელიც ასევე დაექვემდებარა სარაკეტო იერიშებს და კიდევ რამდენიმე ძირითადი ქალაქიც. ეს ყველაფერი კი მას შემდეგ, რაც დაიწყო აღმოსავლეთიდან დასავლეთ მიმართულებით რუსეთის ჯარების ინტენსიური გადაადგილება. წუხელ მთელი ღამის განმავლობაში ძალიან აქტიური საბრძოლო მოქმედებები მიმდინარეობდა უშუალოდ კიევის სიახლოვეს. ქალაქები ირპინი, ბუჩი პრაქტიკულად აღარ არსებობს. ასევე ძალიან მძიმე მდგომარეობაა მელიტოპოლში, რომელიც დაიკავეს რუსმა ჯარისკაცებმა. დაახლოებით მსგავსი ვითარებაა ქალაქ ხერსონში. იქ ამზადებენ ე.წ. რეფერენდუმს ხერსონის რუსეთის ფედერაციასთან შეერთების თაობაზე. მარიოპოლთან არის ასევე ძალიან მძიმე მდგომარეობა. რაც შეეხება ქალაქ ვოლნოვახას, იქ უკრაინულმნა მხარემ დაადასტურა, რომ იქ უკვე რუსეთის შეიარაღებული ძალები იმყოფებიან. ასე რომ ვითარება დრამატულია, ნამდვილად არასახარბიელო, თუმცა მე-18 დღეა მიმდინარეობს წინააღმდეგობა უკრაინის თავდაცვის ძალებისა“, – განაცხადა ცხვიტავამ.