რუსმა ოკუპანტებმა ბუჩას საკრებულოს ადმინისტრაციულ შენობა დაარბიეს და რამდენიმე ადამიანი დაატყვევეს.
როგორც საკრებულოში აღნიშნეს, ტყვედ ჩავარდნენ მერიის თანამშრომლები და მოხალისეები, რომლებიც ბოლო დრომდე, დაბომბვის ქვეშ ეხმარებოდნენ ქალაქის მაცხოვრებლებს.
“გასვლისას ოკუპანტებმა გადაყარეს პასპორტები და სხვა დოკუმენტები. ჩვენ ვთხოვთ უკრაინის პრეზიდენტის აპარატს, ვიცე პრემიერს ირინა ვერეშჩუკს, კიევის რეგიონალურ პოლიციის დეპარტამენტს, დაგვეხმარეთ ჩვენი ხალხის გათავისუფლებაში”.- აღნიშნულია განცხადებაში.
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო. ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმირ პუტინმა უკრაინას ომი ვიდეომიმართვით ოფიციალურად გამოუცხადა.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ “უკრაინული აგრესიის” მოგერიებაში.
რუსეთის სამხედრო ძალები უკრაინას სხვადასხვა მიმართულებით უტევენ. პარალელურად, მსოფლიოს ქვეყნები რუსეთს სხვადასხვა სახის სანქციას უწესებენ.