საქართველოს კულტურის პალატის ხელმძღვანელი დავით ოქიტაშვილი „ნაციონალურ მოძრაობას“ საკუთარ ფეისბუქ გვერდზე აკრიტიკებს. ოქიტაშვილი ამბობს, რომ „ნაციონალური მოძრაობა“ ქვეყანას განსაცდელს უმზადებს და საზოგადოება ამისათვის მზად უნდა იყოს.
„იუდა ჟამს ეძიებდა და ეს ჟამიც დადგა… „ნაციონალური მოძრაობის“ კლასტერი ისევ მოადგა ჩვენს ქვეყანას, ისევ განსაცდელს უმზადებენ, ლოიალურ-დემოკრატიული ნიღბით ისევ შიშს იწვევენ ადამიანებში, მაგრამ ქართველ ხალხს მოკლე მახსოვრობა არ აქვს, მათი დემოკრატია-დემონოკრატიაა, მათი დაპირება-მხოლოდ ლამაზად შეფუთული სიტყვებია, წარღვნად რომ მოვარდება ჩვენს ქვეყანაზე. გონს მოდით ბატონებო, არ მისცეთ საჯიჯგნად ჩვენი ერი ამ სვავებს, თორემ ხალხი თვითონ გასცემს პასუხს, ვერ აიტანს ამდენ ღალატს, თმენის ვალდებულებასაც აქვს თავისი ზღვარი“- წერს დავით ოქიტაშვილი.
კულტურის პალატის ხელმძღვანელს ქართული საზოგადოების სიბრძნის იმედი აქვს და ფიქრობს, რომ ხალხის მოტყუება ადვილი არ არის. ოქიტაშვილი პოლიტპატიმრის ცნებაზეც ამახვილებს ყურადღებას და აღნიშნავს, რომ ზვიად გამსახურდიასა და მერაბ კოსტავას გვერდით სხვა პატიმრების ხსენება დაუშვებელია.
„ყვარყვარე სულ ეძებს აღმასვლას, მაგრამ ქართველი ხალხი აღარაა ყვარყვარეს საზოგადოება. ქართველი ხალხი, არ მივცემთ გუშინდელ კრიმინალებს, გმირის სამოსში ჩაცმულთ, ცხვრის ტყავში გახვეულ მგლებს იმის საშუალებას, რომ ისევ მოფინონ ღვარძლი და ბოროტება ჩვენს ქვეყანას. არ დავკარგავთ ჩვენს ედემს, ბილწს ზავით არ შევეკვრებით, არც პოლიტპატიმრების გარჩევა გვიკვირს. ისინი გვახსოვს-ზვიად გამსახურდია და მერაბ კოსტავა. სირცხვილია მათ გვერდით საერთოდ ვინმეს ხსენება. ესეც გაივლის. ყველაფერი კარგად იქნება ჩემო ერთგულო ხალხო. P:S “ადამიანს აქვს შუბლის ძარღვი, ის რომ გაუწყდება მერე “იოლია” ძალიან ცხოვრება,” – წერს დავით ოქიტაშვილი.