ხმამაღლა შეიძლება თქმა: დიახ, სწორია პოლიტიკა, როდესაც საქართველოს ხელისუფლება ცდილობს, რომ ომში არ ჩაერთოს ჩვენი ქვეყანა და არ დატრიალდეს უბედურება, რომლის გამოსწორებაც შეუძლებელი იქნება, – ამის შესახებ საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ „ქრონიკაში“ განაცხადა.
მან Facebook-ზე გამოქვეყნებული თავისი სტატუსიც განმარტა, რომელიც პატრიარქის მოსაყდრე, მეუფე შიოს ქადაგებაზე გამოხმაურების პასუხად დაწერა. „დღეისთვის საქართველოს ომში ჩათრევის მსურველებს ამ სცენარზე ხელი არ აუღიათ და ამბიონზეც უვარდებიან ქვეყანაში მშვიდობის მსურველებს“, – დაწერა რამდენიმე დღის წინ ჯაღმაიძემ.
„დიდი ხნის განმავლობაში აკვირდებით ამ პროცესს და რადგანაც ეს მაინც პოლიტიკური პროცესია, ვცდილობთ, არ გავაკეთო განცხადებები, რომლებიც პოლიტიკურ სასწორზე დაიდება. თუმცა როდესაც სუფთა ქრისტიანული მოსაზრება ხდება თავდასხმის ობიექტი, როდესაც ერის სიყვარულით ნათქვამი სიტყვები და წინდახედვით ნათქვამი სიტყვები ხდება თავდასხმის საგანი, გიწევს ამაზე რეაგირების გაკეთება. აბა რა არის კარგი? დღეს მოვემზადოთ ომისთვის, რომ საკუთარ ტერიტორიაზე ჩვენს ძმებთან ვიომოთ? ჩვენ ხომ ბევრჯერ ვთქვით, რომ აფხაზებთან და ცხინვალის რეგიონში მცხოვრებ ოსებთან არ ვაპირებთ დიალოგის გარდა სხვა ურთიერთობით შემორიგებას. რას ნიშნავს, როცა სხვა გზისკენ მოგვიწოდებენ, რომ მათ წინააღმდეგ იარაღი ავიღოთ ხელში? ეს ხომ უკვე ცდება პოლიტიკასაც, ეს თითოეულ ჩვენგანს ეხება. და ვისი შვილების ხარჯზე აპირებენ ეს ადამიანები თავისი მოსაზრებების რეალიზებას, ვის ხარჯზე ან პერსპექტივაში რას ხედავენ? ძალიან სამწუხაროა, როდესაც ამბიონზე გვივარდებიან განკითხვით და პასუხი არ აქვთ ამ შეკითხვებზე, რაც ახლა დავსვი“, – განაცხადა ჯაღმაიძემ.