ბიოუსაფრთხოების ექსპერტის ლელა ბაქანიძის თქმით, რუსეთის სამიზნეა არა მხოლოდ ლუგარის ცენტრია, არამედ მსგავსი ლაბორატორიები სხვა ქვეყნებშიც. ამ თემაზე ბაქანიძემ გადაცემაში „შემდეგი გაჩერება“ ისაუბრა.
მან განმარტა, რომ ლუგარის ცენტრი ცარიელ ადგილზე არ აშენებულა და მთლიანად ეყრდნობა ყოფილ შავი ჭირს საწინააღმდეგო სადგურს, რომელიც საქართველოს სადგური იყო, მაგრამ პირდაპირ ექვემდებარებოდა საბჭოთა კავშირის ჯანდაცვის სამინისტროს.
„ძალიან კარგად იციან რუსეთში რა საფუძველი ჰქონდა ლუგარის ცენტრის აღმოცენებას. ლუგარის ცენტრი დაერქვა, თორემ სინამდვილეში არის რეფერენს-ლაბორატორია. ლუგარის ცენტრი სენატორ ლუგარის პატივსაცემად, რომელსაც სენატორ ნანთან ერთად საფრთხეების შემცირების პროგრამა ჰქონდა. მსგავსი ლაბორატორიები, რომლებიც განსაკუთრებით საშიშ ინფექციებზე მუშაობდნენ, იყო საბჭოთა კავშირის ყველა რესპუბლიკაში, მათ შორის რუსეთში იყო ბევრი. სწორედ ამ ლაბორატორიების მოდერნიზაცია იყო ამერიკული პროგრამის უმთავრესი მიზანი“, – ამბობს ექსპერტი.
მისი თქმით, ასევე მოხდა რუსეთში, ნოვოსიბირსკის ლაბორატორიის მოდერნიზაცია, სადაც ამჟამად ყვავილის ვირუსი ინახება.
„რუსეთის სამიზნე არის არა მხოლოდ ლუგარის ცენტრი, არამედ მსგავსი ლაბორატორია უკრაინაში, ყაზახეთში და გადასწვდნენ მონღოლეთსაც, სადაც ევროკავშირი აქტიურად მუშაობს ამ საფრთხეების შემცირებაზე. ასე რომ, კრემლმა მიზანში ამოიღო, ბევრს ლაპარაკობს ლაბორატორიებზე, რომლებიც დასავლური სამყაროს მიერ არის შექმნილი და საიდანაც დიდი საფრთხე შეიძლება გელოდოს“, – განაცხადა ბაქანიძემ.