პეტერბურგის სასამართლომ ორი თვით პატიმრობა მიუსაჯა რუსეთის მართლმადიდებელი ეკლესიის ყოფილ მღვდელ იოანე კურმოიაროვს, რომელიც ბრალდებულია რუსეთის არმიის შესახებ “ფეიკების” გავრცელების მუხლით. მუხლი სასჯელის ზომად 10 წლამდე თავისუფლების აღკვეთას ითვალისწინებს.
გამოცემა “სიბირ.რეალიის” თანახმად, ყოფილი სასულიერო პირის წინააღმდეგ საქმე აღიძრა “იუტუბის” არხით 2022 წლის 22 მარტს გავრცელებული ვიდეოს გამო სახელწოდებით, “ვინ მოხვდება ჯოჯოხეთში, ვინ – სამოთხეში?” მასში კურმოიაროვი რუსეთის არმიას უწოდებს აგრესორს, რომელიც “თავს დაესხა და ხოცავს მშვიდობიან მოსახლეობას მეზობელ ქვეყანაში”.
კურმოიაროვი პეტერბურგში დააკავეს და მისი ჩხრეკის დროს ამოიღეს მობილური ტელეფონი და აქსესუარები – ორი ხატი, ხის ჯვარი და ანაფორა.
2020 წლის ზაფხულში კურმოიაროვმა შეიარაღებული ძალების მთავარი ტაძრის მშენებლობა გააკრიტიკა. “ეს არის კიდევ ერთი მაგალითი იმისა, თუ როგორ იქცევა მართლმადიდებლობა ბანალურ წარმართობად, თავისი ტაძრებით, ზეციური მფარველებით, სამხედრო ფილიალების ხატებით, ტაძრების პროფესიული მიკუთვნებით”, – დაწერა მაშინ უკმაყოფილო სასულიერო პირმა.
ამის შემდეგ რუსეთის პატრიარქმა კირილემ კურმოიაროვს მსახურება ორი თვით აუკრძალა “რუსეთის მართლმადიდებელი ეკლესიის სასულიერო პირის ტიტულთან შეუსაბამობის გამო” და “უღირსი საქციელის ყველა გარემოების” გარკვევამდე.
2021 წლის დეკემბერში კურმოიაროვმა დაწერა განცხადება რუსეთის ფედერაციის საგამოძიებო კომიტეტში თავდაცვის მინისტრის, სერგეი შოიგუს წინააღმდეგ. მღვდელი მიიჩნევდა, რომ მოსკოვის მახლობლად მდებარე “პატრიოტის პარკში” თავდაცვის სამინისტროს ტაძარში წითელი არმიის ჯარისკაცებისა და კომუნისტური სიმბოლოების ამსახველი ფრესკები შეურაცხყოფდა მორწმუნეთა გრძნობებს.
2022 წლის აპრილში მას საეკლესიო ღირსება ჩამოართვეს. მოსკოვის ეპარქიამ მიიჩნია, რომ იგი “თხზავდა არასანდო ინფორმაციას ” რუსეთის არმიის შესახებ.