ევროკომისიის გზავნილი არის შანსი ქართველი ხალხისთვის, გავიგოთ, რას გვეუბნებიან ევროპელები, რატომ დადგა კითხვის ნიშნის ქვეშ ჩვენი ევროპელობა, – ამის შესახებ „გირჩის“ ლიდერმა, დეპუტატმა იაგო ხვიჩიამ განაცხადა.
„მხოლოდ ეს გზავნილი ვერ მომცემს ოპტიმიზმის საფუძველს. ეს არის შანსი ქართველი ხალხისთვის, გავიგოთ, რას გვეუბნებიან ევროპელები, რატომ დადგა კითხვის ნიშნის ქვეშ ჩვენი ევროპელობა. მთავარი რეკომენდაცია, რომელიც მოგვცეს, არის ის, რომ – 30 წელია არსებობთ და ვერ მიხვდით, რომ ოდესღაც უნდა დამთავრდეს ერთი კაცის და ერთი პარტიის მმართველობა ამ ქვეყანაში, ოდესმე უნდა ისწავლოთ ძალაუფლების ერთმანეთთან გადანაწილება და ჩხუბის ნაცვლად საუბარი. ეს პრეტენზია მეტ-ნაკლები თანაბრობით ეხება ყველა პოლიტიკურ პარტიას“, – აცხადებს ხვიჩია.
ევროკომისიის პრეზიდენტმა, ურსულა ფონ დერ ლაიენმა პრესკონფერენციაზე განაცხადა, რომ რეკომენდაციას უწევეს საბჭოს, საქართველოს მიანიჭოს ევროპული პერსპექტივა და შემდეგ კანდიდატის სტატუსის მინიჭებამდე პირობების შესრულება შეფასდეს.