ცხადია, რომ ოპოზიცია ამაში უნდა იღებდეს მონაწილეობას, მაგრამ რა ფორმატით და როგორ, მგონი, ეს არამარტო „ქართულ ოცნებაზეა“ დამოკიდებული, არამედ თვითონ ოპოზიციაზეც. ჩვენ ამასთან დაკავშირებით გვაქვს კონსულტაციები და ალბათ კიდევ გვექნება ახლო მომავალში, – ამის შესახებ „გირჩის“ ერთ-ერთმა ლიდერმა, ალექსანდრე რაქვიაშვილმა ევროკომისიის რეკომენდაციების შესრულებაზე საუბრისას განაცხადა.
„ცხადია, რომ ჩვენც უნდა ვიმუშაოთ და ცხადია, უნდა ვიმუშაოთ რაღაცნაირად ერთად, თუ გვინდა მართლა შევასრულოთ. უბრალოდ, იმდენად სკეპტიკურად ვარ განწყობილი იმის მიმართ, რომ „ქართული ოცნება“ შეასრულებს ამ პუნქტებს, მაინც არ მაქვს შინაგანი რწმენა, რომ ახლა მართლა დავსხდებით და ამას გავაკეთებთ, მაგრამ მცდელობა ბუნებრივია, უნდა იყოს“, – განაცხადა რაქვიაშვილმა.
ირაკლი კობახიძემ საზოგადოებას ის გეგმა გააცნო, რომლის მიხედვითაც მმართველი გუნდი ევროკავშირის წევრობის კანდიდატის სტატუსის მისაღებად საჭირო 12 რეკომენდაციის შესრულებას აპირებს.