პარლამენტთან გუშინ ღამე გამართულ აქციას მმართველი გუნდის წევრები გამოეხმაურნენ. ქართული ოცნების წევრების შეფასებით, აქციამ სახელწოდებით „შინ ევროპისკენ“ პარტიული შინაარსი მიიღო. მათივე განმარტებით, ევროკავშირი საქართველოს გეგმების აღსრულებას მშვიდობიანი გზით მოუწოდებს, ოპოზიციური პარტიები კი, ანტიევროპულად განაგრძობენ დესტაბილიზაციის გზით ქვეყანაში მიმდინარე მოვლენების არევას. მმართველი გუნდის წევრები აღნიშნავენ, რომ მათ რადიკალური ნაბიჯების გადადგმის გარდა, რაიმე ერთობლივი გეგმა არ გააჩნიათ.
„ეს აქცია პარტიული შინაარსის აქციად გადაიქცა, რომლის მიზანიც არის: „მოდი, შენ წადი ხელისუფლებიდან, მე ამ მიტინგით მოვალ ხელისუფლებაში“. აქედან გამომდინარე, რა თქმა უნდა, ეს აქცია თავისი შინაარსით აქტუალური აღარ ხდება“, – მიიჩნევს საპარლამენტო უმრავლესობის წევრი ირაკლი ქადაგიშვილი.
აქცია „შინ ევროპისკენ“ საღამოს 20:00 საათზე, პარლამენტის შენობასთან დაიწყო. ადგილზე შეკრებილი განსხვავებული პოლიტიკური შეხედულების საზოგადოება აქციის ორგანიზატორებისგან კონკრეტულ სამოქმედო გეგმას ითხოვდნენ. ორგანიზატორებმა კი საზოგადოებას „ქართული ოცნების“ ოფისისკენ წასვლა მოსთხოვეს, რამაც აქციაზე მყოფი ხალხის გარკვეულ ნაწილში, მათ შორის სტუდენტებში, უკმაყოფილება გამოიწვია.
„ნაცმოძრაობის“ მომხრეები აქციაზე სიტყვით გამომსვლელთა პარალელურად აჟღერებდნენ საკუთარ მოთხოვნას მიხეილ სააკაშვილის დაუყოვნებლივი გათავისუფლების შესახებ.