ორი კვირის წინ აქციაზე 100 000 კაცი გამოვიდა დღეს, ბოლოს დამთავრდა 10 კაცით. აქციის ორგანიზატორების ქმედებების შედეგად, სულ მცირდებოდა რაოდენობა. ისინი არ ცვლიდნენ არც მოთხოვნებს, არც ქცევის წესს და ბოლოს დარჩა 10 კაცი. არ შეიძლება ეს ხელისუფლებას არ აწყობდეს, – ამის შესახებ „გირჩის“ ერთ-ერთმა ლიდერმა, იაგო ხვიჩიამ „ქრონიკასთან“ განაცხადა.
„მე არ მგონია, რომ ეს მხოლოდ სისულელის ბრალია და რამდენიმე ათეულმა ადამიანმა დაშალა 100 000-კაციანი აქცია. შეიძლება იქ სასარგებლო იდიოტებიც მონაწილეობდნენ, მაგრამ დარწმუნებული ვარ, ეს პროცესი რაღაცნაირად სინქრონიზებულია იმ ხალხთან, რომელსაც აწყობდა მიტინგის დაშლა და საპროტესტო მუხტის მილევა. ეს გამოვიდა. თუ ეს მართლა ხელისუფლების და სუს-ის შემოქმედებაა, ჩემი აზრით წარმატებით გამოუვიდათ და კომპლიმენტი ეკუთვნით. ეს თუ შემთხვევით მოხდა აქციის ორგანიზატორების მიერ, იმიტომ რომ ისინი ასეთები არიან, მაშინ ჩემი აზრით პოლიტიკურმა სპექტრმა, საზოგადოებამ, ყველაფერი უნდა ვიღონოთ იმისთვის, რომ ეს ხალხი კვლავ არ აღმოჩნდეს ტრიბუნაზე, რომ ისევ იგივე არ განმეორდეს“, – აღნიშნა ხვიჩიამ.