აშშ მხარს უჭერს კანადის გადაწყვეტილებას გერმანიაში Nord Stream 1-ისთვის ტურბინის დაბრუნების შესახებ. ამის შესახებ აშშ-ის სახელმწიფო დეპარტამენტის განცხადებაშია ნათქვამი.
„აშშ ერთიანია ჩვენს მოკავშირეებთან და პარტნიორებთან ევროპის ენერგეტიკული უსაფრთხოების ხელშეწყობის, რუსეთის ენერგეტიკაზე ჩვენი კოლექტიური დამოკიდებულების შემცირებისა და კრემლზე ზეწოლის შენარჩუნების ვალდებულებაში. ამ თვალსაზრისით, ჩვენ მხარს ვუჭერთ კანადის მთავრობის გადაწყვეტილებას, დააბრუნოს გერმანიაში ბუნებრივი აირის ტურბინა Nord Stream 1-ის მილსადენში გამოსაყენებლად. მოკლევადიან პერსპექტივაში, ტურბინა საშუალებას მისცემს გერმანიას და ევროპის სხვა ქვეყნებს შეავსონ გაზის მარაგები, გაზარდონ ენერგეტიკული უსაფრთხოება და მდგრადობა და დაუპირისპირდნენ რუსეთის მცდელობებს, ენერგეტიკა იარაღად გამოიყენონ“, – ნათქვამია განცხადებაში.
მანამდე ევროკომისიის წარმომადგენელმა, ტიმ მაკფიმ განაცხადა, რომ კანადის მიერ Nord Stream 1-ისთვის ტურბინის დაბრუნება რუსეთის წინააღმდეგ ევროკავშირის სანქციების პოლიტიკას არ არღვევს, ვინაიდან სანქციები გაზის ტრანზიტისთვის განკუთვნილ აღჭურვილობაზე არ ვრცელდება.
9 ივლისს, კანადამ განაცხადა, რომ გერმანული კომპანია Siemens-ის შეკეთებულ ტურბინას დააბრუნებს, რომელიც საჭიროა რუსულ გაზსადენ Nord Stream 1-ის მომსახურებისთვის.
მედიის ინფორმაციით, ტურბინა გერმანიას გადაეცემა, ხოლო შემდეგ გერმანია მას კომპანია გაზპრომს გადასცემს, რათა კანადამ საკუთარი სანქციები არ დაარღვიოს.