თეა თუთბერიძე – სააკაშვილს ხელისუფლება თავზე ვანო მერაბიშვილმა დაამხო

„სააკაშვილს ხელისუფლება თავზე ვანო მერაბიშვილმა დაამხო“,-ამის შესახებ გაზეთ „პრაიმტაიმს“ „თავისუფლების ინსტიტუტის“ აღმასრულებელმა დირექტორმა თეა თუთბერიძემ განუცხადა.
თუთბერიძის თქმით, მერაბიშვილი წლების განმავლობაში იყო შინაგან საქმეთა მინისტრი და თავდაცვის სამინისტროს გარდა თითქმის ყველა უწყებას აკონტროლებდა. თუთბერიძის ინფორმაციითვე, ხშირ შემთხვევაში ვანო მერაბიშვილს შეცდომაში შეჰყავდა და შეგნებულად არასწორ ინფორმაციას აწვდიდა პრეზიდენტს.
„იგივე 2008 წლის ომის პერიოდში ვანო მერაბიშვილს აქვს კონკრეტული პირებისთვის ნათქვამი, რომ გარკვეული საკითხები პრეზიდენტისთვის არ ყოფილიყო მიწოდებული. ეს ეხება ძალიან მნიშვნელოვან და სენსიტიურ თემას, ამიტომ მე უფრო მეტი კონკრეტიკისგან თავს შევიკავებ. სააკაშვილის მთავარი შეცდომა იყო ის, რომ მან ერთ კაცს მისცა ყველაფრის უფლება. სააკაშვილმა მერაბიშვილი გაპრემიერებით ჩამოაშორა ძალოვან სტრუქტურებს, რითაც საგრძნობლად შეამცირა მისი გავლენის არეალი,“ – განუცხადა გამოცემას თუთბერიძემ.
გამოცემისთვის მიცემულ ინტერვიუში თუთბერიძემ 2013 წელს დათა ახალაიას სახელით გავრცელებული განცხადების ნამდვილობაც დაადასტურა, სადაც საუბარი ახალაია-მერაბიშვილის დაპირისპირებაზეა.