თბილისის მუნიციპალურ ავტოპარკს კიდევ 15 ახალი ავტობუსი შეემატა. ახალი ავტობუსები დედაქალაქის ქუჩებში 1 იანვრიდან გავა და მგზავრებს სტანდარტულ ფასად მოემსახურება.
MAN-ის 15-ვე ავტობუსი N51 ხაზზე დაინიშნება და გრძელ დისტანციაზე-გლდანიდან დიღმის მასივის, დიდუბის, საბურთალოსა და ვაკის გავლით ბაგების სტუდქალაქამდე იმოძრავებს.
ავტობუსები დღეს თბილისის მერმა დავით ნარმანიამ მედიის წარმომადგენლებს გააცნო. დავით ნარმანიას თქმით, გერმანულმა კომპანია “Man truck and bus AG”-მა ავტობუსების მეორე ნაწილი წინმსწრებით, ქართული მხარის თხოვნით გამოგზავნა.
“ეს არის შემდგომი პარტია, რომელიც იანვარში უნდა მიგვეღო, თუმცა მომწოდებელმა კომპანიამ ჩვენი თხოვნის საფუძველზე დააჩქარა მოწოდების პროცესი, ასე რომ ჩვენ მათთან შეთანხმებულ გრაფიკს ვუსწრებთ. მომდევნო ავტობუსებიც შედარებით უფრო მალე იქნება მიღებული, ასე რომ კომპანია მაქსიმალურად ითვალისწინებს ჩვენს ბაზაზე არსებულ მდგომარეობას და უფრო დროულად გვაწვდის ავტობუსებს. ვიდრე ავტობუსები მოემსახურებიან მომხმარებელს, დამონტაჟდება გადახდის სისტემა, ტაბლო და ავტობუსები აღიჭურვება თავიდან ბოლომდე, რათა კომფორტულად მოემსახურონ ჩვენს თანამოქალაქეებს“, – განაცხადა დავით ნარმანიამ.