პოლიტიკურ პასუხისმგებლობასთან დაკავშირებით მერმა უკვე გააკეთა განცხადება და მეც ვუერთდები მას. ჩვენ მზად ვართ, თუ იქნება გარკვეული პასუხისმგებლობა გამოკვეთილი, ვაგოთ პასუხი არა მარტო პოლიტიკურად, არამედ სრულად, კანონის წინაშე, – ამის შესახებ ანდრია ბასილაიამ „ქრონიკაში“, ვაკის პარკში დატრიალებულ ტრაგედიაზე საუბრისას განაცხადა. თბილისის მერის მოადგილემ ოპოზიციის იმ ნაწილის კრიტიკასაც უპასუხა, რომლებიც დღეს თბილისის მუნიციპალიტეტის მთავრობის სხდომაზე დასწრებას ითხოვდნენ.
„დღეს მთავრობის სხდომა არ ჩატარდა. რა თქმა უნდა, გვქონდა გარკვეული დღის წესრიგი, მაგრამ იქიდან გამომდინარე თუ რაც ხდება გამოძიების ფარგლებში, შეუძლებელი იყო ჩვეულებრივი სხდომის ჩატარება და მერმაც ახსენა ეს. შესაბამისად ვერ ვხვდები რაშია პრობლემა და პრეტენზია. იმიტომ რომ რეალურად, სხდომა არ ჩატარებულა. განცხადება გააკეთა მერმა და ეს იყო“, – განაცხადა ბასილაიამ.