საზოგადოების დიდ ნაწილს დაავიწყდა გახარიას არსებობა და თუ არა ასეთი დაყროყინება, არ მგონია, სხვა რამით შეუძლია ყურადღების მიქცევა, – ამის შესახებ პარლამენტის პირველმა ვიცე-სპიკერმა გია ვოლსკიმ გიორგი გახარიას დღევანდელ განცხადებაზე კომენტირებისას აღნიშნა.
კერძოდ, გია ვოლსკი გამოეხმაურა პარტია „საქართველოსთვის“ ლიდერის გიორგი გახარიას სოციალურ ქსელ „ტვიტერში“ გამოქვეყნებულ განცხადებას, სადაც გახარიამ დაწერა: „დემოკრატიის უდიდესი მტრები კორუფცია და ოლიგარქიაა. საქართველოში ორივე უნდა დამარცხდეს“.
გია ვოლსკი მიიჩნევს, რომ გახარიას განცხადების საფუძველი სპეკულაციაა.
„გახარიამ განცხადება გააკეთა კორუფციის, ივანიშვილის ოლიგარქობის თაობაზე და არ ვფიქრობ, რომ ის, როგორც პოლიტიკოსი და თუნდაც, როგორც პიროვნება, საუკეთესო მხარით წარდგა საზოგადოების წინაშე. მან ვრცელი გზა გაიარა, ბიზნესომბუდსმენობიდან პრემიერ-მინისტრობამდე და არ მგონია, ადამიანს, ვისაც გარკვეული ურთიერთობა ჰქონდა თუნდაც პირადად ბიძინა ივანიშვილთან, მის გუნდთან, რაიმე რეალობა იყოს იმასთან დაკავშირებით, რომ დარღვევები და გადაცდომები არსებობდა. არ შეიძლება, სხვა საფუძველი ჰქონდეს ამ განცხადებას, თუ არა პოლიტიკური მიზანი და სპეკულაცია. საზოგადოების დიდ ნაწილს დაავიწყდა გახარიას არსებობა პოლიტიკურ ველზე და თუ არა ასეთი დაყროყინება, არ მგონია, სხვა რამით შეუძლია ყურადღების მიქცევა“, – განაცხადა გია ვოლკიმ.