ყველანი, ერთად თუ ცალ-ცალკე, ვნებენ საქართველოს მისწრაფებას უკეთესი მომავლისკენ, მათ შორის, ევროკავშირის რეკომენდაციების შესრულების გზაზე, – ამის შესახებ საპარლამენტო უმრავლესობის წევრმა, ირაკლი ქადაგიშვილმა ოპოზიციური ერთობის პერსპექტივაზე საუბრისას განაცხადა.
„ესაა პოლიტიკური ხრწნის პროცესში არსებული რადიკალური ოპოზიციის შიგნით მიმდინარე დიფუზია. აქედან გამომდინარე, ადამიანს შესაძლოა, თავგზაც კი აებნეს, ვინ ვის უერთიანდება და ვინ ვის ებრძვის, ვინ ვისთანაა დაპირისპირებული. ეს არ იქნებოდა საინტერესო, რომ არა ერთი რამ – ყველანი, ერთად თუ ცალ-ცალკე, ვნებენ საქართველოს მისწრაფებას უკეთესი მომავლისკენ, მათ შორის, ევროკავშირის რეკომენდაციების შესრულების გზაზე“, – განაცხადა ქადაგიშვილმა.
ვაშაძე-ჯაფარიძე-ხოშტარია ოპოზიციური გაერთიანების იდეით რამდენიმე დღის წინ გამოვიდნენ. ისინი დღეს სამოქალაქო სექტორთან და მოსახლეობასთან შეხვედრას მართავენ. მიუხედავად იმისა, რომ თავად არ ერთვებიან ევრო რეკომენდაციის შესასრულებლად შექმნილ სამუშაო ჯგუფებში, ქვეყნის ევროპულ პერსპექტივას პარლამენტს გარეთ განიხილავენ და სამოქმედო გეგმებს თავიანთ აუდიტორიას აცნობენ.