სამწუხარო რეალობაა, რომ 7 ნოემბერი იყო სიმბოლური გამოვლინება იმ ძალადობრივი მმართველობისა, რომელსაც მიხეილ სააკაშვილი ახორციელებდა ამ ქვეყანაში, – ამის შესახებ საპარლამენტო უმრავლესობის წევრმა, ირაკლი ჩიქოვანმა გადაცემა „იმედი LIVE“-ში განაცხადა.
„7 ნოემბერი იყო რეალური სახე იმისა, თუ როგორი სახელმწიფოს მშენებლობას ცდილობდა „ნაციონალური მოძრაობა“ და მიხეილ სააკაშვილი. საქართველოს არცერთ მოქალაქეს უფლება არ აქვს ეს დაივიწყოს. ჩვენ ვისწავლეთ მწარე გაკვეთილი და ამ გაკვეთილმა უნდა მოგვცეს იმ დასკვნების შესაძლებლობა, რომელიც ქვეყანაში დემოკრატიულ სისტემას აგვაშენებინებს და აგვაშენებინებს სახელმწიფოს, რომელიც ევროკავშირის ნაწილი გახდება“, – აღნიშნა ირაკლი ჩიქოვანმა.
2007 წლის 7 ნოემბრის მოვლენებიდან 15 წელი გავიდა. სამი დარბევა ერთ დღეს, აქციის დაშლა რუსთაველის გამზირსა და რიყეზე, შეჭრა ტელეკომპანია „იმედში“ – სპეცდანიშნულების რაზმმა მომიტინგეების წინააღმდეგ ცრემლმდენი გაზი, ხელკეტები, რეზინის ტყვიები, აკუსტიკური იარაღი და წყლის ჭავლი გამოიყენა. 7 ნოემბრის საღამოს კი სპეცრაზმი ტელეკომპანია „იმედში“ შემოიჭრა და არხის მაუწყებლობა გათიშა.