“7 ნოემბერი არ იყო მხოლოდ და მხოლოდ შეცდომა, ეს ნამდვილად იყო დანაშაული”

7 ნოემბერი არ იყო მხოლოდ და მხოლოდ შეცდომა, ეს ნამდვილად იყო დანაშაული,- ამის შესახებ პარლამენტის წევრმა თეონა აქუბარდიამ განაცხადა.

„7 ნოემბერი ნამდვილად მძიმე დღე იყო, მე თავად გახლდით აქციაზე და ეს არ იყო მხოლოდ და მხოლოდ შეცდომა, ნამდვილად დანაშაული იყო, რასაც შემდგომ სამართლებრივი შეფასებაც მოჰყვა. 7 ნოემბერი გამოირჩევა როგორც აქციის მონაწილეების დილის, ასევე საღამოს დარბევის, მათ შორის, კონსტიტუციური ნორმიდან გასვლით და განსაკუთრებით იყო დამოუკიდებელი მედიისა და ჟურნალისტების წინააღმდეგ შტურმი“, – აღნიშნა აქუბარდიამ.

2007 წლის 7 ნოემბრის მოვლენებიდან 15 წელი გავიდა. სამი დარბევა ერთ დღეს, აქციის დაშლა რუსთაველის გამზირსა და რიყეზე, შეჭრა ტელეკომპანია „იმედში“ – სპეცდანიშნულების რაზმმა მომიტინგეების წინააღმდეგ ცრემლმდენი გაზი, ხელკეტები, რეზინის ტყვიები, აკუსტიკური იარაღი და წყლის ჭავლი გამოიყენა. 7 ნოემბრის საღამოს კი სპეცრაზმი ტელეკომპანია „იმედში“ შემოიჭრა და არხის მაუწყებლობა გათიშა.